پارێزگاری هەولێر لەبارەی ئاسانکارییەکانەوە روونکردنەوە دەدات
قهڵا له ناوهندى شارى ههولێر | فۆتۆ: SNN
نوسینگەی پارێزگاری هەولێر رایگەیاند: هێشتا مەترسی کۆرۆنا کۆتایی نەهاتووە، بەوهۆیەوە هۆڵەکانی پرسە و سەردانی نەخۆش و ئەو شوێنانەی پێویست نین بە قەدەغەکراوی دەمێننەوە.
نوسینگەی پارێزگاری هەولێر لە راگەیەندراوێکیدا کە ئەمڕۆ 11ی ئایار بڵاویکردووەتەوە، ئاماژەی بەوەکرد: “هێشتا یانەکانی مەی خواردنەوە، نێرگەلەکێشان، شوێنەکانی مەساج، هۆڵەکانی ئاهەنگ گێڕان، هۆڵەکانی پرسە، دانانی پرسە، سەردانی نەخۆش لە نەخۆشخانەکان قەدەغەیە”.
راشیگەیاندووە: “هەموو ئەو شوێنانەی کراونەتەوە و کاردەکەن دەبێ پابەندی تەواوی ڕێنماییە تەندروستییەکان بن بۆ خۆپارێزی لەکۆرۆنا، هەر شوێنێک پابەند نەبێت ڕێکاری یاسایی بەرامبەر دەگیرێتەبەر”.
ئاماژەی بەوەشکردووە: “هێشتا مەترسی ڤایرۆسی کۆرۆنا کۆتایی نەهاتووە و پێویستە هاوڵاتییانی پارێزگای هەولێر زۆر بە هەستیارانە مامەڵە بکەن و خۆیان بەدووربگرن لە شوێنە قەرەباڵغەکان و دەستکێش و دەمامک ببەست”.
بەهۆی ئەوەی ماوەی چەند رۆژێکە هیچ حاڵەتێکی تووشبوون بە کۆرۆنا لە هەرێمی کوردستان تۆمارنەکراوە، ژمارەیەک ئاسانکاری زیاتر بۆ ئاسایی بوونەوەی ژیانی هاووڵاتیان راگەیەندراوە.
