بانگخوازێکی کورد لە خورماتوو کوژرا
سیروان حەسەن
بەیانی ئەمڕۆ لە قەزای خورماتوو بانگخوازێکی کورد لەکاتی چوونی بۆ مزگەوت، لەلایەن چەند چەکدارێکی نەناسراو دراوەتەبەر گولە و دەستبەجێ گیانی لەدەستداوە.
حسێن عەلی بەڕێوبەری پۆلیسی خورماتوو بە SNNی ڕاگەیاند: لەکاتی بانگی بەیانی ئەمڕۆ سێ شەممە 12ی ئایاری 2020 لەلایەن چەند چەکدارێکەوە دەستڕێژی گولە لە بانگخوازێکی کورد کراوە و کوژراوە.
وتیشی، ئەو هاووڵاتییە ناوی “فاروق مەجید خورشید”ەو بانگخوازی مزگەوتی سەبورە لە گەڕەکی تینی قەزای خورماتوو، لەکاتی بانگی بەیانی ئەمڕۆ بۆ مزگەوت چووە و دەستڕێژی گولەی لێکراوە.
بەڕێوەبەری پۆلیسی خورماتوو ڕاشیگەیاند، تاوەکو ئێستا نازانرێت کێ لە پشتی ئەو تاوانەوە بووە یاخود چەند چەکداربوون، لێکۆڵینەوەیان لەوبارەیەوە دەستپێکردووە.
