فیفا بڕیارێکی چاوەڕوان نەکراو دەدات

SNN Sport

یەکێتی تۆپی پێی نێودەوڵەتی فیفا، بڕیارێکی چاوەڕوان نەکراو دەدات و خەڵاتی باشترین یاریزانی جیهان دابەش ناکات.

فیفا ساڵانە لە ئاهەنگێکدا خەڵاتی زە بێستی بۆ باشترین یاریزانی جیهان دابین دەکرد، بەڵام ئەمساڵ بەهۆی کاریگەرییەکانی ڤایرۆسی کۆرۆناوە، بڕیاریداوە خەڵاتەکە دابەش نەکات.

بە پێی زانیارییەکان کە دەست رۆژنامەی مارکا کەوتووە، فیفا ئاهەنگی ساڵی 2020ی بۆ بردنەوەی خەڵاتی زە بێست هەڵوەشاندووەتەوەو ئەمساڵ دابەشی ناکات، کە وا بڕیاربوو لە شاری میلانۆی ئیتاڵیا ئاهەنگەکە ساز بکرێت،بەڵام کۆرۆنا رێگربووەو لە ئێستادا هەموو چالاکییە وەرزشییەکانی لە جیهاندا راگرتووە کە دیارترینیان 5 خولە گەورەکەی ئەوروپایە.

هەروەها جیانی ئینفانتینۆی سەرۆکی فیفاش نەیویستووە ئاهەنگی دابەشکردنی ئەو خەڵاتەکە سازبکرێت، ئەمەش بەهۆی ئەوەی لە ئێستادا لە جیهان چەندین هەزار کەس هەڵگری ڤایرۆسەکەن و گیانیان لە دەستداوە.

ئەم بڕیارەی فیفا لە کاتێکدایە، تا ئێستا گۆڤاری فرانس فتبۆڵ کە ساڵانە تۆپی زێڕین دابەش دەکات، هیچ بڕیارێکی بۆ دابەشکردنی خەڵاتەکە یان دابەشنەکردنی نەداوە.

لە ساڵی 2019 میسی توانی ئەم خەڵاتە بباتەوە، ئەمەش دوای ئەوەی لەگەڵ بەرشەلۆنە بووە پاڵەوانی خولی ئیسپانیا.