بەرپرسێکی تەندروستی جیهانی: پێدەچێت کۆرۆنا بۆ هەمیشە بمێنێتەوە

بەرپرسێكی رێكخراوی تەندروستیی جیهانی هۆشداریی دەدات لەوەی ڤایرۆسی كۆرۆنا بۆ هەمیشە بمێنێتەوە و کاتی کۆنتڕۆڵکردنی پەتاکە دیارنیە.

مایك رایان بەرپرسی جێبەجێكاری بەرنامە فریاگوزارییەكانی رێكخراوی تەندروستیی جیهانی، لە ڤیدیۆ كۆنفرانسێكی رۆژنامەوانیدا رایگەیاند، تەنانەت ئەگەر پێکوتەش بۆ پەتاكە بدۆزرێتەوە، هێشتا كۆنتڕۆڵی تەواوەتیی ڤایرۆسەكە هەوڵی زۆری دەوێت.

ناوبراو رایگەیاندووە، لەو بڕوایەدا نییە كەسێك هەبێت بزانێت كەی ڤایرۆسی كۆرۆنا كۆتایی دێت و قسەكردن لەبارەی دیاریكردنی كاتێك بۆ كۆتایی ڤایرۆسەكە واقعی نییە.

ڤایرۆسی کۆرۆنا لە کۆتاییەکانی ساڵی رابردوودا لە شاری ووهانی چین بڵاوبووەوە، دواتر نەخۆشییەکە بۆ سەدان وڵاتی دیکە گواسترایەوە، زانایان لە هەوڵدان پێکوتە و دەرمانێکی کاریگەر بۆ ڤایرۆسەکە بدۆزنەوە.