ئەوروپا لە هەوڵدایە سنوورە ناوخۆییەکانی بکاتەوە
یەکێتی ئەوروپا داوای لە وڵاتانی ئەندام لە یەکێتیەکە کرد دووبارە سنوورە ناوخۆییەکانی یەکێتیەکە بکەنەوە، ئەوەش بە مەبەستی ئاسانکردنی گەشتەکان.
مارگرێت ڤیستاگەر جێگری سەرۆکی کۆمسیۆنی ئەوروپا لە کۆنگرەیەکی ڕۆژنامەوانیدا لە بڕۆکسل رایگەیاند “پێشبینی ناکرێت ئەم هاوینە سنوورەکان بکەینەوە، بەڵام ئەگەر هەوڵ بدەین، ئەوا دەتوانین کارێک بکەین ئەم هاوینە لە ماڵەوە نەبین یاخود داهاتی کەرتی گەشتیاری بۆ هەموو هاوینەکە لەدەست نەدەین.”
هاوکات ئەنگێلا مێرکڵ راوێژکاری ئەڵمانیا ڕایگەیاندووە: لە هەوڵداین تا مانگی حوزەیران ئەو کۆتوبەندانە لاببەین کە بەهۆی ڤایرۆسی کۆرۆناوە خراوەتە سەر سنوورەکانی ئەڵمانیا، هەروەها ڕۆژی شەممە سنوورەکانی لەگەڵ لۆکسۆمبۆرگدا دەکاتەوە.
مێرکڵ ئاماژەشی بەوەدا وڵاتە دراوسێکانی وەکو فەڕەنسا و نەمسا و سویسرا هەمان ئامانجیان هەیە.
وڵاتانی ئەوروپا بەشێکی زۆری داهاتی ساڵانەیان لە رێگەی کەرتی گەشتیاریەوە کۆدەکەنەوە و داخستنی سنوورەکان بەهۆی بڵاوبوونەوەی ڤایرۆسی کۆرۆناوە زیان بە ئابووری ئەوروپا دەگەیەنێت.
