نوێنەرى کاسبکارانى عەلوەى سلێمانى”لە سبەینێوە دەرگاى عەلوە دادەخەین”
یەکێک لە عەلوەکانی هەرێم، وێنە: ئەنادۆڵو
SNN
سەرۆکی ليژنەی سەنديکای عەلوەی سلێمانی رايگەياند:” لە سبەينێوە دەرگای عەلوە دادەخەن”، سەرۆکی ئەنجومەنی پارێزگای سلێمانيش دەڵێت” کێشەکەیان لە چارەسەر نزیک بۆتەوە”.
سەروەر عەلی سەرۆکی ليژنەی سەنديکای عەلوەی سلێمانی لە لێدوانێکيدا بە SNNی راگەياند:”بڕیارمانداوە لە رۆژى هەینیەوە دەرگاى عەلوە دابخەین،ئەمەش وەک ناڕەزایەتیەک لە بەرامبەر چارەسەر نەکردنى کێشەى شۆفێران و کاسبکارانى عەلوە لە سنورەکان”.
راشيگەیاند: “تا ئێستا بەشێوەى بنەڕەتى چارەسەرى کێشەکەمان نەکراوە بۆیە بڕیارمانداوە لە سبەینێوە دەرگاى عەلوە دابخەین،ئەگەر کێشەکەمان چارەسەر نەکرێت ئەوا بۆ رۆژانى داهاتووش بەردەوام دەبین لە مانگرتن”.
وتیشى: “لە ئێستادا و لە پاش بڵاو بونەوەى هەواڵى داخستنى عەلوە نرخى سەوزە و خۆراک لە بازاڕەکاندا بەرز بۆتەوە ،کە ئەوە خواستى ئێمە نیە بۆیە داواکارین کێشەى بازرگانان و شۆفێرانى عەلوەى سلێمانى بە زووى چارەسەر بکرێت”.
لەسەر کێشەى کاسبکارانى عەلوەى سلێمانى، ئازاد حەمە ئەمین، سەرۆکى ئەنجومەنى پارێزگاى سلێمانى بە SNNی راگەیاند: “ئاگادارى کێشەى ئەو کاسبکارانەين، چەند جارێک هەوڵدراوە بۆ ئەوەى کێشەکەیان چارەسەر بکرێت و ئەنجومەنیش لیژنەیەکى تایبەتى هەیە و گفتوگۆى لەگەڵ لایەنە پەیوەندیدارەکان کردوە لەسەر گرفتەکانیان و کۆنوسمان ئاراستەى پارێزگار و لایەنى پەیوەندیدار کردووە، هەوڵەکان ئەوە دەردەخەن کە کێشەکەیان لە چارەسەر نزیک بۆتەوە و بەهیواين نەگاتە ئەوەى ئەو کاسبکارانە مانبگرن و عەلوە دابخەن”.
