تۆمەتبارێك دەستگیركرا كە دزی لە چەند هاوڵاتییەك كردبوو

SNN–

مەفرەزەكانی بەشی پۆلیسی ڕێكکاری لەناوی بازاڕی شاری سلێمانی ژنێكیان دەستگیر كرد كە جانتای چەند هاوڵاتییەكی بردبوو .

بەڕێوەبەرایەتی پۆلیسی پارێزگای سلێمانی – ڕاگەیاندن و پەیوەندییەكان بڵاویکردۆتەوە: دوای ئەوەی ئەمڕۆ 16-5-2020 ، زانیاری گەیشتە مەفرەزەكانی پۆلیس كە لەناو بازاڕی شاری سلێمانی بڵاوەیانپێكراوە بەوەی كە ژنێك جانتای هاوڵاتیان دەبات، پۆلیسی ڕێكکاری لێكۆڵینەوەكانی دەستپێكرد و توانرا هەر ئەمڕۆ تۆمەتبارەكە بدۆزرێتەوە و دەستگیر بكرێت كە هەستاوە بە بردنی چوار جانتای ئافرەتان .

 لەئێستادا تۆمەتبار (ش، ع، م) لەدایكبووی 1979 دانیشتووی شاری كەركوك، بەبڕیاری دادوەر ڕاگیراوە و لەكاتی دەستگیركردنیشیدا دەستگیراوە بەسەر بڕێك حەب و چەند نوشتە و جادویەكدا كە حەبەكان نێردراون بۆ پشكنین بەمەبەستی زانیاری لەسەر جۆرەكەی .

جێی ئاماژەیە تۆمەتبار لەلایەن بەشی پۆلیسی نەهێشتنی تاوانەوە ناسراوەتەوە كە پێشتر لەسەر تاوانی دزیكردن دەستگیركراوە .