سزای لەسێدارەدان بەسەر سێ بەندکراوی کورد لە رۆژهەڵات جێبەجێکرا

SNN

رێکخراوی هەنگاو بۆ مافەکانی مرۆڤ رايگەياند: “سزای لەسێدارەدان بۆ دوو برای خەڵکی سەڵماس و هاووڵاتییەکی خەڵکی مەهاباد لە بەندیخانەی ناوەندیی ئورمیە جێبەجێکرا”.

رێکخراوی هەنگاو لە راگەيەندراوێکدا بڵاويکردەوە: “بەرەبەیانی ئەمڕۆ یەکشەممە، سزای لەسێدارەدان بۆ دوو برای کوردی خەڵکی سەڵماس بە ناوەکانی داوود قاسم زاده و بەهائەدین قاسم زاده لە بەندیخانەی ناوەندیی ئورمیە جێبەجێ کرا، کە لەساڵی 2009وە بە تۆمەتی کوشتنی دوو کەسی دیکە دەستبەسەرن”.

ئاماژەی بەوەشکردووە: “داوود قاسم زاده لە کاتی دەستبەسەر کران بە هۆی ئەشکەنجەی هێزە ئەمنییەکان بڕبڕەی پشتی بە سەختی بریندار بووە و زۆر بە سەختی جووڵەی کردووە”.

دەشڵێت “پێشتر راگەیەندراوبوو کە بەهائەدین لەکاتی ئەنجامی تاوانەکە 15ساڵ بووە، بەڵام هەنگاو ئاگادارە کە ناوبراو تەمەنی 20ساڵ و یەک مانگ بووە”.

هەنگاو راشيگەياندووە: “سزای لەسێدارەدانی ئەنوەر عەبدوڵاهی خەڵکی مەهاباد جێبەجێ کراوە، ناوبراو پێشتر بە تۆمەتی کوشتنی ئەنقەست سزای سێدارەی بە سەردا سەپابوو و رۆژی رابردوو لەگەڵ ئەو دوو برایە بۆ ژووری تاکەکەسی بەندیخانەی ئورمیە گوازرابوویەوە”.