هاتووچۆی عێراق: تابلۆکانی ئۆتۆمبێل لە نێوان هەرێم و پارێزگاکانی دیکە دەگوازرێنەوە

SNN

بەڕێوەبەری گشتیی هاتووچۆی عێراق ڕایگەیاند، “دوای ڕێککەوتن لەگەڵ هەرێمی کوردستان لەبارەی یەکخستنی تابلۆی ئۆتۆمبێلەکان، هاووڵاتیانی باشوور و ناوەڕاستی عێراق دەتوانن بەبێ گرفت تابلۆکانی هەرێم بگوازنەوە بۆ بەغدا و بە پێچەوانەوە”.

تاریق ئیسماعیل بەڕێوەبەری هاتووچۆی عێراق لەبارەی یەکخستنی تابلۆی ئۆتۆمبێلەکان لەگەڵ هەرێمی کوردستان رایگەیاند: “هەرێمی کوردستان لەئێستادا لەگەڵ ئەو کۆمپانیایەدا کاردەکات کەماوەی 10 ساڵە ئێمە کاری لەگەڵ دەکەین، رێککەوتنێکی سەرەتایی لە نێوان ئێمە و هەرێمدا هەیە بۆ یەکخستنی تابلۆی ئۆتۆمبێل”.

وتیشی: “دوای گەیشتن بەڕێککەوتن لەگەڵ هەرێمی کوردستان، ئیتر هاوڵاتیانی باشوور و ناوەڕاستی عێراق دەتوانن بەبێ گرفت تابلۆکانی هەرێم بگوازنەوە بۆ بەغدا و شارەکانی دیکەی عێراق و بە پێچەوانەشەوە”.

ئاماژەی بەوەشکرد، “ئەو ئۆتۆمبێلانەی کە هەڵگری تابلۆکانی هەرێمن و لە ناوچەکانی ناوەڕاست و باشوری عێراقن، سەرپێچییەکانیان بەسیدی ڕەوانەی هاتوچۆی هەرێم دەکرێن، بۆ ئەوەی لەکاتی تازەکردنەوەی ساڵانەکانیان سزای دارایی سەرپێچییەکانیان لێی وەربگیرێت”.