داهاتی ئەمساڵی هاتووچۆی سلێمانی نزیکەی 50 ملیار دینار بووە و ڕادەستی وەزارەتی دارایی كراوە

SNN-عەلی حەمە سەعید

بەڕێوەبەری هاتووچۆی پارێزگای سلێمانی بە وەکالەت ئاماژە بەوەدەكات، لە ماوەی شەش مانگی سەرەتای ئەمساڵ زیاد لە 49 ملیار دینار داهاتیان هەبووە سەرجەم ئەو داهاتەشیان گەڕاندووەتەوە بۆ وەزارەتی دارایی، هاوکات سەبارەت بە سیستمی گرێبەستی ئەلیکترۆنیش دەڵێت، هەر کەس ئەو گرێبەستەی پێنەبێت ناتوانێت ئۆتۆمبێلەکەی بکات بە ناوی خۆیەوە.

عەمید سالار عەلى، بەڕێوەبەری هاتووچۆی پارێزگای سلێمانی بە وەكالەت بە SNNی ڕاگەیاند: “لەگەڵ ئەوەی كە بڕیاربوو لەم مانگە كار بە سیستمەی ئەلیكترۆنی بكرێت لەسەرجەم پێشانگاكانی كڕین و فرۆشتنی ئۆتۆمبێل، بەڵام بەهۆی ئەوەی ژمارەیەك لە پێشانگاكانی ئۆتۆمبێل داوای درێژكردنەوەی ئەو وادەیان كرد بەهۆی تەواونەكردنی ڕێكارە یاساییەكان، ئێمە ئەو وادەیەمان بۆ كۆتایی مانگی ئاب درێژكردەوە و لە 1/9/2021 هەر كەسێك گرێبەستی ئەلیكترۆنی پێنەبێت ناتوانێت ئۆتۆمبێلەكەی بكات بەناوی خۆیەوە”.

ئاماژەی بەوەشكرد، “هەر بەهۆی ئەو بڕیارەی بە ئەلیكترۆنیكردنی گرێبەستەكانی كڕین و فرۆشتنی ئۆتۆمبێل ژمارەیەكی زۆر زیاتری هاووڵاتیان بەمەبەستی تۆماركردن و بەناوكردنی ئۆتۆمبێل، سەردانیان كردوون ئەوەش دواجار بووەتە هۆی زیاتر بوونی داهاتی بەڕێوەبەرایەتی هاتووچۆی پارێزگای سلێمانی”.

بەڕێوەبەری هاتووچۆی پارێزگای سلێمانی بەوەكالەت ئەوەشی خستەڕوو، “لە ماوەی شەش مانگی ڕابردووی ئەمساڵدا داهاتی بەڕێوەبەرایەتییەكەمان بریتی بووە لە بڕی 49 ملیار و 970 ملیۆن دینار، هاوكات بۆ كۆكردنەوەی پارە و داهات تەنیا پسوڵەی وەزارەتی دارایی بەكاردەهێنن و دوای وردبینیكردنی داهاتەكان سەرجەمی گەڕێندراوەتەوە بۆ خەزێنەی وەزارەتی دارایی”.