بەهۆی کۆرۆنا رێگە نادرێت دانیشتوانی تاران بچنە دەرەوەی شارەکە

SNN

 لیژنەی باڵای بەرەنگاربوونەوەی کۆرۆنا لە تاران رایگەیاند، بە هۆی شەپۆلی پێنجەمی کۆرۆناوە، بە هیچ جۆرێک رێگە بە دانیشتوانی شارەکە نادرێت بچنە دەرەوەی پایتەخت.

بەپێی وتەی عەلی رەزا زاڵی بەرپرسی لیژنەکە، هەر هاوڵاتیەک سەرپێچی بکات رێکاری یاسایی لەبەرامبەری دەگیرێتەبەر و بە پێبژاردن سزا دەدرێت.

نەوەی هیندی کۆرۆنا ماوەیەکە لە ئێران بڵاوبووەتەوە و لە ماوەی 24 کاتژمێری رابردوودا زیاتر لە 17 هەزار حاڵەتی نوێی تووشبوون بە پەتاکە تۆمار کراون و 166 کەسیش گیانیان لەدەستداوە.

دۆخی تەندروستی لە 120 شاری ئێران بە سور پۆلێن کراوە و هاتووچۆ لە چەند شارێک سنوردار کراوە.

شەپۆلی پێنجەمی کۆرۆنا لە ئێران لە کاتێکدایە کە تائێستا نزیکەی 5٪ی دانیشتوانی ئەو وڵاتە ڤاکسینی کۆرۆنایان وەرگرتووە.