قەدەغەی هاتووچۆی نیمچەیی لە عێراق درێژکرایەوە

SNN

بە هۆی هەڵکشانی ژمارەی تووشبووانی کۆرۆنا لیژنەى باڵاى تەندروستى و سەلامەتی عێراق بریاریدا بە درێژکردنەوەی قەدەغەی هاتووچۆی رێژەیی بۆ ماوەی یەک هەفتە.

نووسینگەی راگەیاندنی مستەفا کازمی سەرۆکوەزیرانی عێراق بڵاویکردەوە، رۆژی چوارشەممە 7ی تەممووزی 2021، لیژنەی باڵای تەندروستی و سەلامەتیی عێراق بە سەرۆکایەتیی کازمی کۆبووەوە.

لە کۆبوونەوەکەدا لەسەر راسپاردەی وەزارەتی تەندروستی، لیژنەى باڵاى تەندروستى و سەلامەتی عێراق چەند بڕیارێکى بۆ بەرەنگاربوونەوەى کۆرۆنا دا.

لە راگەیێندراوەکەدا هاتووە “بەهۆی بەردەوامی بەرزبوونەوەی تووشبوون بە ڤایرۆسەکە، بڕیاردراوە قەدەخەی هاتووچۆ لە کاتژمێر 11:00ی شەو تا 5:00ی بەیانی بۆ ماوەی هەفتەیەکی دیکە درێژبکرێتەوە، لەم ماوەیەدا کۆبوونەوە و دروستکردنی قەرەباڵغی لەشوێنە گشتییەکان قەدەغەیە “.

لە بەشێکی دیکەی راگەیێندراوەکەدا هاتووە، “دەسەڵات دەدرێتە دامودەزگاکانی حکومەت کە رێگری بکەن لە دروستبوونی قەرەباڵغی نێو فەرمانگەکان و کاربکەن بۆ ڕێکخستنی دەوامی فەرمانبەران، بەتایبەتی فەرمانبەرە دووگیانەکان و ئەو دایکانەی منداڵەکانیان تەمەنیان لە شەش ساڵ بچووکترە دەوامەکانیان 50٪ کەم دەکرێتەوە. هەروەها هانی فەرمانبەران دەدرێت هەفتانە پشکنین بکەن و ئەنجامی پشکنینەکانیان بە ئەرێنی نیشانبدەن یان دەبێت بەڵگەنامەی وەرگرتنی ڤاکسین پێشکەشی فەرمانگەکەیان بکەن”.