رێکخراوێکی ئەمریکی رەخنە لە دەستگیرکردنی رۆژنامەنووسانی دهۆک دەگرێت

SNN

کۆمیتەی پاراستنی رۆژنامەنووسان CPJ رەخنە لە دەستگیرکردنی هەشت رۆژنامەنووس دەگرێت، کە لە خۆپیشاندانەکەی دووشەمەی رابردوو لە دهۆک دەستگیرکرابوون.

ئەو رێکخراوە، داوای لە هێزە ئەمنییەکانی دهۆک کردووە کۆتایی بەو تۆمەتانە بهێنێت کە رووبەڕووی چوار لە رۆژنامەنووسەکان کراونەتەوە.

لەوبارەیەوە ئیگناسیۆ میگێل دێلگادۆ نوێنەری رێکخراوەکە لە رۆژهەڵاتی ناوەڕاست و ئەفریقا وتوویەتی: “جارێکی دیکە دەسەڵاتدارانی هەرێم  یاساکانیان بۆ کۆتایی پێهێنانی ئەو رووماڵانە بەکارهێنا کە بەجۆرێک بوون حکومەتی هەرێمی تووشی نارەحەتی کردبوو”.

رێکخراوەکە وردەکاری کەیسەکانی ئەو رۆژنامەنووسانەشی خستووەتەڕوو کە بۆ میدیاکانی یەکێتی و یەکگرتوو کاردەکەن.

هاوکات لێدوانی لە دیندار زێباری بەرپرسی لیژنەی وەڵامدانەوەی راپۆرتە نێودەوڵەتییەکان وەرگرتووە، کە جەختی کردووەتەوە “بڵاوەپێکردنی خۆپیشاندەران بەهۆی مەترسییەکانی کۆرۆناوە بووە، بەو پێیەی خۆپیشاندەران دەمامکیان نەپۆشیووە”.

کۆمیتەی پاراستنی رۆژنامەنووسان، رێکخراوێکی سەربەخۆی قازانج نەویستە، داکۆکی لە مافی رۆژنامەنووسان لە جیهاندا دەکات، بارەگاکەی لە شاری نیویۆرکی ئەمریکایە.