کۆرۆنا 60 ملیۆن کەس بەرەو هەژارییەکی سەخت دەبات
Ezz Zanoun/Apaimages
SNN
بانکی جیهانی رایگەیاندووە، بەهۆی لێکەوتەکانی پەتای کۆرۆناوە پێشبینی دەکرێت زیاتر لە 60 ملیۆن کەس تووشی هەژارییەکی سەخت ببن.
دەیڤد ماڵپاس سەرۆکی بانکی جیهانی رایگەیاندووە: “پێشبینی دەکەین بەهۆی پەتای کۆرۆناوە ئەمساڵ گەشەی ئابووری جیهان بە رێژەی 5% پاشەکشە بکات”.
وتیشی: “هەر لە ئێستاوە کاریگەرییەکانی پەتای کۆرۆنا لەسەر ئابووری و بژێوی ژیانی هاووڵاتیانی جیهان دەرکەوتووە و ملیۆنان کەس کارەکانیان لەدەستداوە”.
بە گوێرەی پێوەری بانکی جیهانی، “هەژاری سەخت” بەمانای ئەوەدێت کەسێک بژێوی رۆژانەی لەسەر کەمتر لە یەک دۆلار و 90 سەنتە.
ئەمەش دوای ئەوەدێت لە چەند رۆژی رابردوودا، عادل رکابی وەزیری کار و کاروباری کۆمەڵاییەتی عێراق رایگەیاندبوو: بەهۆی پەتای کۆرۆنا و راگرتنی بەشێک لە کار و کاسبی هاووڵاتیانی عێراقەوە، چوار ملیۆن کەس لە وڵاتەکەدا بێکاربوون و 11 ملیۆن کەسیش داوای بیمەی بێکارییان کردووە.
