ملیاردێرەکانی جیهان ئەمساڵ زۆرترین زیانیان بەرکەوتووە

SNN

گەورەترین ملیاردێرەکانی جیهان پێکەوە ئەمساڵ 152 ملیار دۆلار زیانیان بەرکەوتووە، هۆکارەکەشی بۆ لێکەوتەکانی بڵاوبوونەوەی ڤایرۆسی کۆرۆنا دەگەڕێتەوە.
گۆڤاری فۆربس-ی ئەمریکی لە راپۆرتێکیدا نوسیویەتی دوو هەزار و 660 ملیاردێری جیهان، ئەمساڵ 1.6 تریلیۆن دۆلاریان کۆکردووەتەوە، ئەمە لە سەرەتای مانگی کانوونی دووەمی ئەمساڵەوە تا کۆتاییەکانی ئەم مانگە.
بەڵام لەلایەکی دیکەوە بەشێک لە ملیاردێرەکانی جیهان تووشی زەرەر و زیانی گەورە هاتوون، زۆرینەی ئەو کەسانەش لە چینن، سەرمایەدارەکانی چین بەهۆی هەرزانبوونی بەهای پشکەکانی کۆمپانیاکانیان ئەو زیانەیان بەرکەوتووە و ئەوەش بەهۆی لێکەوتەکانی کۆرۆناوە بووە.
لە پلەی یەکەمی ئەو ملیاردێرانەی کە ئەمساڵ زۆرترین زیانی پێگەیشتووە، کۆڵین کینگ هوانگ-ی رەچەڵەک چینی دێت کە دامەزرێنەری پلاتفۆرمی (ئی-کۆمێرس)ە، ناوبراو ئەمساڵ 64%ی کۆی سامانەکەی لەدەستداوە کە دەگاتە 40 ملیار و 200 ملیۆن دۆلار، بەوەش سامانەکەی بۆ 22 ملیار دۆلار کەمیکردووە.
لەدوای ئەویش گاک ما، گەورە ملیاردێری چینی دێت کە بەڕێوەبەری جێبەجێکاری پێشووی گروپی کۆمپانیاکانی ئەلیبابا-یە، ناوبراو 21 ملیار دۆلار زیانی بەرکەوتووە و سامانەکەی بۆ 37 ملیار دۆلار کەمیکردووە.
بڵاوبوونەوەی ڤایرۆسی کۆرۆنا کاریگەری لەسەر چەندین کەرتی وەبەرهێنان و گەشتیاری و پیشەسازی هەبوو لە جیهاندا و گۆڕانکاری گەورەی لە نرخی نەوتیشدا دروستکرد.