دوو یەکەی تایبەتی ئەمریکی و بەریتانی راهێنان دەکەن لەسەر رزگارکردنی زیلینسکی

SNN

دوو یەکەی تایبەتی ئەمریکی و بەریتانی لە نزیک ئۆکرانیا جێگیر کراون، بۆ ئەوەی لەهەر کاتێکدا گیانی ڤلۆدۆمیر زیلینسکی سەرۆکی ئەو وڵاتە کەوتە مەترسییەوە بەهانایەوە بچن و رزگاری بکەن.

بەپێی هەواڵێکی میدیاکانی بەریتانیا 70 سەربازی ئەندامی یەکەی تایبەتی ئێس ئەی ئێسی بەریتانی و 150 سەربازی هێزی تایبەتی دەریاوانی ئەمریکا لە لیتوانیا جێگیرکراون و لەگەڵ ژمارەیەک هێزی تایبەتی ئۆکرانی لە مەشق و راهێنانی چڕدان.

ئەوەش خراوەتەڕوو، ئەو دوو هێزە تایبەتە بەریتانی و ئەمریکییە ئەرکدار کراون بۆ ئەوەی هەرکات ژیانی زیلینسکی کەوتە مەترسییەوە رزگاری بکەن.

ئەمەش دوای ئەوە دێت کە بڵاوکرایەوە کە هێزی تایبەتی رووسیا کە بە سپێتسناز ناسراوە لە هەوڵی کوشتنی سەرۆکی ئۆکرانیادایە.

لەسەرەتای دەستپێکردنی هێرشەکانی رووسیا بۆ سەر ئۆکرانیا ئەمریکا پێشنیازی کردبوو کە ڤلۆدۆمیر زیلینسکی لەو وڵاتە بباتە دەرەوە، لەبەرامبەردا ناوبراو رایگەیاندبوو، پێویستە بە هاوکاری سەربازییە نەک گەشتکردن.