ئەمڕۆ کارەبا 24ی دەبێت

SNN

بڕيارە ئەمڕۆ کارەبای 24 کاتژمێری بۆ هەرێم دابينبکرێت و بەپێی رێژەی بەکارهێنانی کارەبا لە ئەمڕۆدا پێدانی کارەبا بە شار و شارۆچکەکان دياريدەکرێت، ئەندامێکی ئەنجومەنی پارێزگای سلێمانيش دەڵێت “ئەم کاتە گونجاو نييە بۆ تاقيکردنەوە چونکە لە سنووری سلێمانی و هەڵەبجە کارەبا کەم بەکاردێت”.

کەريم عەلی ئەندامی ئەنجومەنی پارێزگای سلێمانی لە پۆستێکيدا رايگەياند: بڕیارە ئەمڕۆ وەزارەتی کارەبا ووزەی کارەبا بۆماوەی   24 کاتژمێر دابین بکات بۆ هەمووناوچەکان وەک و تاقیکردنەوە بۆ دیاری کردنی بەرکەوتەی پارێزگاکان لە ووزەی کارەبا.

راشيگەياندووە: لە ڕێگای ئەم تاقیکردنەوەیەوە ڕێژەی پێدانی کارەبای پارێزگاکان دیاری دەکرێت، ئێمە لە لیژنەی پیشەسازی و ووزە ئەم کاتە بەگونجاو نازانین بۆ ئەو تاقیکردنەوەیە چونکە لەم کاتەدا لە سنووری پارێزگاکانی سلێمانی و هەڵەبجە و ئیدارەکانی گەرمیان و ڕاپەڕین بەکارهێنانی کارەبا ڕێژەکەی کەمەو هاووڵاتیان زۆرکارەبا بەکارناهێنن لە چاو وەرزی زستان و هاوین.

دەشڵێت “لە ساڵانی ڕابردووشدا بەهۆی ئەم جۆرە تاقیکردنەوانەوە ڕێژەی کارەبای پێویست نەدراوە بەم سنوورە ڕێژەکەی بەو شێوازە بووە”.

کەريم عەلی باسی لەوەشکردووە: پارێزگاکانی سلێمانی و هەڵەبجەو ئیدارەکانی گەرمیان و ڕاپەڕین نزیکەی  %34بووە بەڵام ڕێژەی کارەبای پشکی پارێزگاکانی هەولێر و دهۆک نزیکەی  %66بووە، بۆیە ئێمە لە هەستکردنمان بەو گرفتە پێشنیار دەکەین کاتی ئەو تاقیکردنەوەیە بخرێتە مانگەکانی تەمووز و ئاب یاخود کانونی دووەم و شوبات لە ساڵەکاندا.