ئەمساڵ جوتیاران هەرچەندە گەنمیان هەبێت حكومەت لێیان وەردەگرێت

SNN-عەلی حەمە سەعید

جیاواز لە ساڵانی ڕابردوو كە ڕێژەیەكی دیاریكراو گەنم لە جوتیاران وەردەگیرا، ئەمساڵ بەهۆی بەرزبوونەوەی نرخی گەنم لە بازارەكانی جیهاندا و هەروەها كەمبوونەوەی ڕێژەكەی و وشكە ساڵی، حكومەتی عێراقی بڕیاریداوە كە جوتیاران هەرچەندە گەنمیان هەبێت لێیان وەربگرێت، هاوكات لە ماوەی 10 ڕۆژیشدا سەرجەم پارەی گەنمی جوتیاران دابیندەكرێت.

تەها ڕەحیم، سەرۆكی لقی سلێمانی یەكێتی جوتیارانی كوردستان بە SNNی ڕاگەیاند: جیاواز لە ساڵانی ڕابردوو كە نرخی گەنم هەرزانتر بوو هەروەها لە بازاڕەكانی جیهانیش گرفتی كەمی گەنم بوونی نەبوو وشكە ساڵی ڕووی نەدابوو حكومەتی عێراق ڕێژەیەكی دیاریكراو گەنمی لە جوتیاران وەردەگرت بە نموونە بۆ هەر دۆنمێك بڕی 100 كیلۆ گەنمی لە جوتیاران دەكڕیەوە ئەوەش ڕێژەیەكی زۆر كەمبوو، دەبوو جوتیاران ئەو گەنمەی كە دەیانمایەوە لە بازاڕەكان بە نرخێی هەرزانتر بیفرۆشنەوە ئەوەش زیانێكی زۆری لێدەدان.

ئاماژەی بەوەشكرد، بەڵام ئەمساڵ بەهۆی وشكە ساڵی و كەمبوونەوەی ڕێژەی گەنم و بەرز بوونەوەی نرخەكەی لەبازاڕەكانی جیهان، حكومەتی عێراق پلانی هەیە جوتیاران هەرچەندە گەنمیان هەبێت لێیان وەربگرێتەوە، چونكە ئەمساڵ ڕێژەی بەرھەمی گەنم زۆر كەمە و مەرجیش نییە جوتیاران گەنمەكانیان ڕادەستی سایلۆكان بكەن، چونكە بەھۆی بەرزبوونەوەی نرخەكەی لە جیھاندا، ئەگەر ھەیە زۆرێك لە جوتیاران گەنمەكانیان بە نرخی بازرگانی بخەنە بازاڕەوە.

نەوزاد شێخ كامیل، بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم بە SNNی ڕاگەیاند: سایلۆكانی ھەرێمی كوردستان بۆ وەرگرتنی گەنمی جوتیاران ئامادەكراون و بەم نزیكانە وادەی وەرگرتنی گەنم رادەگەیەنرێت كە چاوەڕوان دەكرێت ئەمساڵ لە ١/٦ەوە گەنم لە جوتیاران وەربگیرێت بڕیاریشە دوای ١٠ بۆ ١٥ رۆژ لە وەرگرتنی گەنم پارەی جوتیاران دابەشبكرێت.