نوێترین زانیاری لە بارەی كۆبوونەوەی یەكێتی و پارتی

SNN-عەلی حەمەسەعید

ئەندامێكی مەكتەبی سیاسی یەكێتی ئاماژە بەوەدەكات: كۆبوونەوەكانی (بافل جەلال تاڵەبنی) سەرۆكی یەكێتی و نێچیرڤان بارزانی سەرۆكی هەرێم و هاوكات كۆبوونەوەی هەردوو مەكتەبی سیاسی یەكێتی و پارتی ڕێگەخۆشكەربوون بۆ ئەوەی كە تاڕادەیەكی باش پەیوەندییەكانی نێوان ئێمە و پارتی ئاسایی ببێتەوە، بۆیە بەدڵنیاییەوە لە داهاتوودا كۆبوونەوەی دیكەمان دەبێت و گفتوگۆ لەسەر پرسە هەڵواسراوەكانی نێوانمان دەكەین.

سەعدی ئەحمەد پیرە، ئەندامی مەكتەبی سیاسی یەكێتیی نشیمانیی كوردستان بەSNN ی ڕگەیاند: ئەو دۆخەی ئێستا هاتووتە ئاراوە لەگەڵ مانگێك پێش ئێستا زۆر جیاوازە لە پەیوەندییەكانی نێوان یەكیتی و پارتی، بەتایبەت كە نێچیرڤان بارزانی سەرۆكی هەرێم هاتە سلێمانی و لەگەڵ (بافل جەلال تاڵەبانی) سەرۆكی یەكێتی كۆبوویەوە و دواتریش هەردوو مەكتەبی سیاسی یەكێتی و پارتی لە هەولێر كۆبوونەوە، ئەمە هەنگاوێكی زۆر باش بوو بۆ ئاسایكردنەوەی پەیوەندییەكانمان.

ئاماژەی بەوەشكرد: لەسەر بنەمای ئەو كۆبوونەوانەی كە لە هەفتەكانی ڕابردوو ئەنجامماندان بەدڵنیاییەوە كۆبوونەوەی دیكەی ئێمە و پارتی درێژەی دەبێت و لە داهاتوودا كۆبوونەوەی هەردوو مەكتەبی سیاسی یەكێتی و پارتی بەڕێوەدەچێت، بەڵام دەبێت پێش كۆبوونەوەكە زەمینە سازی باشی بۆبكرێت.

ئەو ئەندامەی مەكتەبی سیاسی یەكێتی نشتیمانی كوردستان ئەوەشی خستەڕوو: بێگومان كۆبوونەوەكانی نێوان ئێمە و پارتی گفتوگۆكردن دەبێت لەسەر پرسە هەواڵسراوەكانی نێوانمان لەسەر بابەتی سەرۆككۆمار و هەروەها پرسە ناوخۆییەكانی هەرێمی كوردستان لە بابەتی یاسای هەڵبژاردن و كۆمیسیۆن و چەند بابەتێكی دیكە.