بەمەبەستی هەرزانكردنی نرخی مریشك بڕیارێک جێبەجێ دەکرێت

SNN-عەلی حەمە سەعید

وەك هەنگاوێك بۆ دابەزاندنی نرخی مریشكی زیندوو لە بازاڕەكانی هەرێمی كوردستان بەتایبەت لە سنوری پارێزگای سلێمانی و ڕێگریكردن لە زیاتر بەرز بوونەوەی نرخەكە، بەڕێوەبەری چاودێری بازرگانی سلێمانی ئاماژە بەوەدەكات هەناردەكردنی مریشكی زیندوومان بۆ پاریزگاكانی دیكەی عێراق ڕاگرتووە و هەركاتیش نرخی مریشك هاتەوە خوار چوار هەزار دینار ئەوكات ڕێگە بە هەناردەكردنی دەدرێت.

سۆران عەبدولغەفور، بەڕێوەبەری چاودێری بازرگانی سلێمانی، بە SNNی ڕاگەیاند: ماوەی چەند هەفتەیەكە نرخی مریشك بەرز بوونەوەی بەرچاوی بەخۆیەوە بینیوە ئەوەش وایكردووە كە هەندیك لەهاووڵاتیان نەتوانن بە ئاسانی توانای كڕینی مریشكی زیندوویان هەبێت، هاوكات گران بوونەكەشی پەیوەندی بە چەندین هۆكاری ناوخۆیی و دەرەكییەوە هەیە، بەجۆرێك نرخی كیلۆیك مریشك لە چەن ڕۆژی ڕابردوودا پێنج هەزار دیناری تێپەڕاند، بەڵام ئێمە بۆ ڕێگریكردن لە زیاتر بەرز بوونەوەی نرخی مریشك ڕێكاری پێویستمان گرتووەتە بەر.

ئاماژەی بەوشكرد، یەكێك لەو هەنگاوانەی گرتوومانەتەبەر بۆ ڕێگریكرن لە زیاتر بەرزبوونەوەی نرخی مریشك و هەروەها هەرزانكردنەوەی نرخەكەی ئەوەیە كە لەئێستادا ڕێگەنادرێت مریشكی زیندووی ناو كێڵگەپەلەوەرییەكان هەناردەی پارێزگاكانی دیكەی عێراق بكرێت، ئەوەش كاریگەری دەبێت لەسەر كەمكردنەوەی نرخەكە لە بازاڕەكانی هەرێمی كوردستان بەتایبەت لە سلێمانی.

بەڕێوەبەری چاودێری بازرگانی سلێمانی ئەوەشی خستەڕوو، تائەوكاتەی نرخی كیلۆیك مریشك دێتەوە خوار چوار هەزار دینار ڕێگە نادرێت مریشك هەناردەی پارێزگاكانی دیكەی عێراق بكرێت، لەكاتێكدا لەئێستادا نرخی یەك كیلۆ مریشك لە ناوخۆی هەرێمی كوردستان زیاد لە چوار هەزار و 200 دینارە، ئەوەش نرخێكی بەرزەو بەهۆی بەرز بوونەوەی نرخی عەلەف و پێداویستییەكانی كێڵگە پەلەوەرییەكان نرخی مریشكیش بەرز بووەتەوە.