ڕێکەوت زەکی: لامەرکەزی بە بێ دارایی کاریگەری نابێت
SNN
ڕێکەوت زەکی ئەندامی ئەنجومەنی پارێزگای سلێمانی رایگەیاند: “لامەرکەزی کارگێڕی بە بێ دارایی هیچ کاریگەرییەکی نابێت”.
لە وەڵامی وتارێکی مەسرور بارزانی سەرۆکی حکومەتی هەرێمی کوردستاندا ئەو ئەندامەی ئەنجومەنی پارێزگای سلێمانی رایگەیاند: ” لامەرکەزی کارگێڕی و دارایی ھیچیان بەبێ ئەویتریان بەھای نیە، ھەروەک ئەوەی کەبەڕێوەبەرایەتی ھاتوچۆی سلێمانی سەرو ١٩ ملیار دیناری ساڵانی پێشوی ھەیە بەڵام ناتوانێت یەک دیناری خەرجبکات، لەکاتێکدا لە ١٧٪ ی داھاتیان بەحساب بۆ خۆیانە”.
ئاماژەی بەوەشکرد: “لامەرکەزی نەداواکاری دەوێت نەڕێککەوتنی لایەنەکان، دروشمە و ھیچیتر، ئێستا نزیک دەبینەوە لەساڵێکی تەمەنی کابینەی نۆیەم واتە چارەکێکی تەمەنی کابینەکە، کەچی ھەموو جار سەرۆکی حکومەت و بەیاننامەکانی حکومەت دەڵێت لامەرکەزی بەشێکە لەکارنامەی کابینەی نۆیەم، ئەو ھەنگاوانە بۆ جێبەجێکردنێ ئەو خاڵەی کارنامەکە کامەیە؟ بێگومان ھیچ”.
ئەو ئەندامەی ئەنجومەنی پارێزگا ئەوەشی خستووەتەڕوو: “بە پێچەوانەوە ھەنگاوی توندکردنەوەی مەرکەزیەت دەستی پێکردووە بە جۆرێک پرۆژەی دەستەیەک لەلایەن سەرۆک وەزیرانەوە ئامادەیە بەناو دەستەی خاڵە سنوریەکان، کە تێدا فڕۆکەخانەی ھەولێر و سلێمانی لە وەزارەتی گواستنەوە و سەرجەم دەروازە سنوریەکان لە وەزارەتی دارایی وەردەگرێتەوەو دەخرێتە سەر ئەم دەستەیە و ڕاستەوخۆ دەیبەستێتەوە بەسەرۆک وەزیرانەوە”.
وتیشی: “ئەوە جگە لەوەی تائێستا وەزارەتی سامانە سروشتیەکان کە سەرچاوەیەکی دیکەی داھاتە لەلایەن خودی سەرۆکی حکومەتەوە ئیدارەدەدرێت و بێ وەزیرە”.
ڕێکەوت زەکی باسی بەوەشکردووە: “پرۆژەی دەستەیەکی دیکە بەناوی خۆراک و دەرمان ئامادەیە و بەشێک لە وەزارەتی کشتوکاڵ و بەشێک لەوەزارەتی تەندروستی لێدەکاتەوە و دەخرێتە سەر ئەم دەستەیە و ڕاستەوخۆ دەبەسترێتەوە بە سەرۆک وەزیرانەوە، واتە وەزارەتەکانیش بەرەو بچوکبونەو ەو سەرۆکی حکومەت بەرەو دەسەڵاتی ڕەھا”.
ئەمەش دوای ئەوەدێت، ئێوارەی ئەمڕۆ مەسرور بارزانی سەرۆکی حکومەتی هەرێمی کوردستان رایگەیاند لەگەڵ لامەرکەزی کارگێڕیدان.
