SNN وادەی دانیشتنی پەرلەمانی عێراق ئاشكرادەكات
SNN-عەلی حەمە سەعید
هەوڵەكانی چوارچێوەی هەماهەنگی بۆ ئەنجامدانی كۆبوونەوەی پەرلەمانی عێراق چڕكراونەتەوە بۆ ئەومەبەستەش لە ئێستادا نزیكەی 190 واژۆی پەرلەمانتاران كۆكراوەتەوە بۆ ئەنجامدانی كۆبوونەوە، هاوكات لە نێوان 26 تا 28ی ئەم مانگە دیاریكراوە بۆ ئەنجامدانی كۆبوونەوەكە و بڕیاریشە لە 30 ئەم مانگە خۆپیشاندانی تشرینییەكان دەستپێبكەنەوە.
بەگوێرەی ئەو زانیارییانەی كە لە پەرلەمانتارانی كورد لە ئەنجومەنی نوێنەرانی عێراق بە SNN دراون ئەوەخراوەتەڕوو، پەرلەمانتارانی چوارچێوەی هەماهەنگی هەوڵەکانیان چڕكردووەتەوە بۆ ئەوەی كۆبوونەوەی ئەنجومەنی نوێنەران دەستپێبكاتەوە، بۆ ئەومەبەستەش نزیكەی 190 واژۆی پەرلەمانتارانیان لە فراكسیۆنە جیاوازەكان كۆكردووەتەوە و ئاراستەی سەرۆكی پەرلەمانیان كردووە بۆ ئەوەی بڕیاری لەسەر دەستپێكردنەوەی دانیشتنەكانی پەرلەمانی عێراق بدات.
ئاماژەبەوەشكراوە، چوارچێوەی هەماهەنگی 26 تا 28ی ئەم مانگەیان دیاریكردووە بۆ ئەوەی كۆبوونەوەی ئەنجومەنی نوێنەرانی عێراق بەڕێوەبچێت، بۆ ئەومەبەستەش تاڕادەیەكی زۆر كۆدەنگی زۆرینەی فراكسیۆنەكانی ناو پەرلەمانیان بەدەست هێناوە بۆ ئەوەی دەوامی پەرلەمان ئاسایی بكرێتەوە و دەستبكرێتەوە بە دانیشتنەكانی پەرلەمان.
SNN ئەوەشی زانیوە كە وابڕیارە لە 30 ی ئەم مانگە جارێكی دیكە لایەنگرانی تشرینییەكان دەستبكەنەوە بە خۆپیشاندان، هاوكات پەرلەمانتارانی چوارچێوەی هاوئاهەنگی ترسی ئەوەیەان هەیە كە لایەنگرانی سەدرییەكانیش تێكەڵ بەو خۆپیشاندانەی تشرینییەكان ببن و جارێكی دیكە دۆخەكە ئاڵۆز ببێتەوە، بۆیە بڕیاریانداوە پێش ئەنجامدانی ئەو خۆپیشاندانە كۆبوونەوەی پەرلەمان بەڕێوەبچێت، بەڵام پێناچێت لەو كۆبوونەوەیەدا سەرۆككۆمار هەڵبژێردرێت.
