دوو بریار لە محەمەد شیاع سودانییەوە بۆ وەزیرەکانی کابینەکەی

SNN-
سەرۆکوەزیرانی نوێی عێراق لە یەکەم کۆبوونەوەی ئەنجوومەنی وەزیراندا دوو بڕیاری بۆ وەزیرەکانی کابینەکەی دەرکرد و راشیگەیاند، لە ئاست ئەو بەرپرسیارێتییەدا دەبن کە خراوەتە ئەستۆیان.

بە گوێرەی راگەیەندراوێکی نووسینگەی سەرۆکوەزیرانی عێراق، محەمەد شیاع سودانى لە یەکەم کۆبوونەوەی ئەنجوومەنی وەزیراندا، بڕیاریدا بەوەی کە دەبێت وەزیرەکان سەروەت و سامانی خۆیان ئاشکرابکەن و پۆستى بەڕێوەبەرى نوسینگەکانیان بە فەرمانبەرانى وەزارەتەکانیان پڕ بکەنەوە.

هەروەها سودانی بە وەزیرەکانی راگەیاندووە بەڕێوەبەرى نوسینگەکانیان تەنها لە فەرمانبەرانى وەزارەتەکانیان دیارى بکەن و دوربکەونەوە لە پێدانى ئەو پۆستانە بەکەسانى سیاسی، ئەوەش بۆئەوەی دڵنیایی بدەنە فەرمانبەران و هاووڵاتییان کە وەزیرەکانیان پیشەیین.