وەزارەتی پەروەردە: چەند خوێندنگایەکی نوێ دروست دەکەین

SNN-

وەزارەتی پەروەردەی حکومەتی هەرێمی ڕایگەیاند، لە چەند هەفتەی داهاتوو، ژمارەیەک باڵەخانەی نوێی پەروەردەیی دەکەونە بواری خزمەت و بەردی بناغەی چەند پرۆژەیەکی نوێش لە پارێزگاکانی هەرێمی کوردستان دادەندرێت.

وەزارەتەکە لە راگەیەندراویکدا ئەمڕۆ شەممە بڵاویکردووەتەوە، لە پارێزگای هەولێر چوار قوتابخانە سێ قوتابخانەی 18 پۆلی و یەک قوتابخانەی 9 پۆلی و یەک باخچەی منداڵانی نوێ تەواوبوون و دەکەونە بواری خزمەتەوە . قوتابخانەیەکی دیکەی 12پۆلی و قوتابخانەیەکی 6پۆلی لەکۆتاییەکانی قۆناغی کارکردنن و تەواو دەبن .

هەروەها لە پارێزگای سلێمانی یەک قوتابخانەی 18 پۆلی و باخچەیەکی منداڵان تەواو بوون و دەکەونە بواری خزمەتەوە .

لە راگەیەندراوەکەی وەزارەتی پەروەردەدا هاتووە کە لە پارێزگای دهۆک بەردی بناغەی دوو قوتابخانەی 18 پۆلی دادەندرێت و لە پارێزگای هەڵەبجە بەردی بناغەی یەک قوتابخانەی 12 پۆلی دادەندرێت.

هەروەها لە پارێزگای هەولێر بەردی بناغەی حەوت قوتابخانەی نوێ دادەنرێت کە شەشیان قوتابخانەی 18 پۆلین و یەک قوتابخانەش 9 پۆلییە.