كۆنگرەی پارتی هیچ گۆڕانكارییەكی بنەڕەتی تیادا ڕوونادات

SNN-عەلی حەمەسەعید

ئەمڕۆ دووەم ڕۆژی كۆنگرەی پارتی لە بینای زانكۆی دهۆك بەردەوام دەبێت، ئەوەی گرنگبووبەلای بنەماڵەی بازرانییەوە چارەسەركردنی گرفتی نێوان دووئامۆزاكە بوو لەسەر پۆستی جێگری سەرۆكی پارتی، بۆیە ئەوەی ماوەتەوە بەلای بارزانییەكانەوە هێندە گرنگ نییە، هەر بەو هۆیەشەوە هیچ گۆڕانكاریەكی بنەڕەتی لە ناوپارتی ڕوونادات و سەرۆك وجێگانی سەرۆك و ژمارەی ئەندامانی سەركردایەتی ومەكتەبی سیاسی وەك خۆیان دەمێننەوە.

بەگوێرەی زانیارییەكانی SNNكە لە ئەندامی كۆنگرەی پارتی وەریگرتوون ئەوەخراوەتەروو، هەرچەندە بەگوێرەی ئەوپلانەی دانرابوو دەبووكۆنگرەی پارتی چوار ڕۆژ بەردەوام بووایە بەڵام لەلایەن بنەماڵەی بارزانییەوە لیژنەی باڵای ئامادەكاری كۆنگرە ئاگادار كراونەتەوەكە هەموو توانایەكی خۆیان بخەنەگەڕ ئەمڕۆ پرۆسەی دەنگدان بۆ سەركردایەتی ئەنجامبدرێت و كۆتایی بە كارەكانی كۆنگرە بهێندرێت، چونكە ئەوەی گرنگ بوو لە كۆنگرە ئەنجامدرا كە بریتی بوو لەچارەسەركردنی گرفتی نێوان دوو ئامۆزاكە لەسەر پۆستی جێگری سەرۆكی پارتی.

ئاماژەی بەوەشكرد، لەم كۆنگرەیەی پارتیدا تەنها گۆڕانكارییەككرابێت زیادكردنی جێگری دووەم بووە بۆ سەرۆكی پارتی، ئەوەش لە پێناو كپكردەوەی ناڕەزایەتییەكان وچارەسەركردنی ململانێی نێوان باڵەكانی مەسروبارزانی و نیچیرەڤان بارزانی، بۆیە لەدوای ئەو بابەتەوە چاوەڕێی هیچ گۆڕانكارییەكی ئەوتۆ ناكرێت، كە كاریگەری ڕاستەوخۆی لەسەر ژیانی سیاسیی حزبەكە و پەیوەندییەكانی دروست بكات، بەڵكو گۆڕانكارییەكان تەنها لە هەندێك دەمووچاودا دەكرێت كە پێشتر بە دڵی بنەماڵەی بارزانی نەبوون

هەر لە زانیارییەكانی SNN ئەوەشهاتووە، هاوكات هیچ گۆڕانكارییەكی گرنگ لە ژمارەی ئەندامانی سەركردایەتی و مەكتەبی سیاسی و هەروەها گۆڕانكاری لە پڕۆگرام و بەرنامە و پەیڕەوی ئەو حزبەدا ڕوونادات، كە بە ئاڕاستەی نوێكردنەوەی پارتی بێت لەسەر ئاستی ناوخۆیی و دەرەوەیی.