لە لیژنە هەمیشەییەكانی پەرلەمانی عێراق كورد سێ لیژنەی گرنگی بەردەكەوێت
SNN- عەلی حەمە سەعید
وابڕیارە لە دانیشتنی داهاتووی پەرلمانی عێراق گفتوگۆبكرێت لەسەر دابەشكردنی لیژنەهەمیشەییەكانی پەرلەمانی عێراق، پەرلەمانتارێكی كوردیش ئاشكرای دەكات لەگەڵ سەرۆكی پەرلەمانی عێراق رێككەوتوون، كە سێ لیژنەی سیادی وەك پشكی كورد دابندرێن، هاوكات گرنگترین لیژنەش كە بۆ كورد پێویستە لیژنەی یاساییە.
شێروان دووبەردانی، ئەندامی ئەنجومەنی نوێنەرانی عێراق لە فراكسیۆنی پارتی بە SNNی ڕاگەیاند: بەمنزیكانەگفتوگۆكان لەبارەی دابەشكردنی لیژنە هەمیشەییەكانی پەرلەمانی عێراق كۆتایی دێت، هاوكات لە خولەكانی پێشووی پەرلەمانی عێراقدا، كورد سەرۆكایەتی سێ لیژنەی لەلابوو، كە ئەوانیش لیژنەی یاسایی، لیژنەی هەرێم و پارێزگاكان و لیژنەی پەیوەندییەكانی دەرەوە بوون، بۆیە پێدەچێت لەم خولەی پەرلەمانیشدا هەمان ئەو لیژنانە لای كورد بمێننەوە.
ئاماژەی بەوەشكرد، لە خولەكانی پێشووەوە ئەگەر هەروەزارەتێك لای هەر پێكهاتەیەك بێت، نابێت سەرۆكی لیژنە پەرلەمانییەكەی لای ئەو پێكهاتەیە بێت، بەڵام پێشتر رێككەوتنێك هەبووە لەگەڵ سەرۆكی پەرلەمانی عێراق، بۆ ئەوەی لیژنەی یاسایی بۆ كورد بێت.
ئەو ئەندامەی ئەنجومەنی نوێنەرانی عێراق ئەوەشی خستەڕوو، گرنگترین لیژنە بۆ كورد لیژنەی یاساییە، چونكە هەموو یاسایەك دێتە پەرلەمان هەنگاوی یەكەم لەلایەن لیژنەی یاساییەوە گفتوگۆی لەسەر دەكرێت، بۆیە بڕیارە لەسەر ئاستی سەرۆك فراكسیۆنەكان كۆبوونەوەیەك بۆ بڕیاردان لەسەر دابەشكردنی سەرۆكایەتی لیژنەكان بكرێت و گفتوگۆ لەسەر ئەو لیژنانە بكرێن كە پشكی كوردن، لە سەرۆك و جێگرانی سەرۆك لیژنەكان و بڕیاردەری لیژنەكان.
