له هه‌ولێر مۆڵێكى تر داخرا له‌به‌ر ئه‌وه‌ى گۆرانى تایبه‌ت به سه‌دام حسێنى لێداوه
یه‌كێك له مۆڵه‌كانى شارى هه‌ولێر | فۆتۆ: SNN
SNN
له شار هه‌ولێر مۆڵێك داخرا كه گۆرانى تایبه‌ت به سه‌دام حسێن تێیدا لێدراوه، قایمقامى هه‌ولێریش هه‌واڵه‌كه پشتڕاستده‌كاته‌وه.
نەبەز عەبدولحەمید، قایمقامی قه‌زاى ناوه‌ندى ھەولێر ئه‌مڕۆ پێنجشه‌ممه 10ى تشرینى دووه‌م، له‌وباره‌یه‌وه رایگەیاند، “ئەو مۆڵە سزای خۆی وەرگرتووە لە ئێستادا داخراوە بە ھۆی لێدانی ئەو گۆرانیەوە”.
وتیشى: “رووداوەکە سێ رۆژ پێش ئێستا بووە و لێکۆڵینەوە لەگەڵ خاوەنەکەی کراوە”.
له‌باره‌ى ورده‌كارى رووداوه‌كه‌وه قایمقامی قه‌زاى ناوه‌ندى ھەولێر ئه‌وه‌شى خسته‌ڕوو، “خاوەنی مۆڵەکە عەرەب نییە، بەڵکو خەڵکی باکووری کوردستانە و دوای لێکۆڵینەوەش دەرکەوتووە گۆرانییەکە لە یوتیوبەوە لێدراوە و بە شێوەکی نەخوازراو چووەتە سەر ئەو تراکە و گۆرانییەکە پیاھەڵدان بووە بە سەدام حوسێن بۆ ئەوەش ھۆشداری دراوەتە خاوەنەکەی”.
له ماوه‌ى رابردوودا له شارى هه‌ولێر مۆڵێك داخرا به‌هۆى ئه‌وه‌ى به‌هه‌مان شێوه‌ى رووداوه‌كه‌ى سێ رۆژ له‌مه‌وبه‌ر هه‌ستابوو به لێدانى گۆرانى تایبه‌ت به ستایشى سه‌دام حسێن، سه‌رۆكى رژێمى رووخاوى به‌عس.
