لە بەغدا هێزە ئەمنییەکان دەخرێنە حاڵەتی ئامادەباشییەوە

SNN

لەسەر بانگەوازی چالاکوانانی عێراق چاوەڕێ دەکرێت دژی سەپاندنی سزا بەسەر چالاکوانێک لەلایەن دادگای عێراقەوە بەتۆمەتی سوکایەتیکردن بە حەشدی شەعبی، خۆپیشاندان لە بە‌غدا و چەند پارێزگایەکی دیکەی عێراق ئەنجام بدرێت و بۆ ئەو مەبەستەش لە بەغدا هێزە ئەمنییەکان خرانە حاڵەتی ئامادەباشییەوە.

لە نامەیەکەدا کە دەستەی ئۆپراسیۆنەکانی سەر بە فەرماندەیی ئۆپراسیۆنە هاوبەشەکانی بەغدا ئاڕاستەی سەرجەم یەکەکانی وەزارەتی ناوخۆی کردوە و وەک فەرمانێکی نهێنی و بەپەلە دەرچوە، ئاماژە بەوەکراوە پێویستە سەرجەم هێزە ئەمنییەکان بخرێنە حاڵەتی ئامادەباشییەوە بۆ پاراستنی یاسا.

ئەوەش خراوەتەڕو، ئەوانەی لە شوێنەکاندا بڵاوەیان پێدەکرێت نابێت چەکیان لابێت و بەگوێرەی پێویستیش هێزەکان لە شوێنی جیاواز جێگۆڕکێیان پێدەکرێت، لەگەڵ هەر گۆڕانکارییەک کە رەنگ بێت روبدات.

شەوی رابردوو لە پارێزگای زیقار خۆپیشاندانی ناڕەزایی هاووڵاتیان بەڕێوەچوو و بەهۆی رووبەڕوبوونەوەشیان لەگەڵ هێزە ئەمنییەکان، سێ خۆپیشاندەر کوژران و 21 کەسی دیکەش برینداربون، بۆیە چاوەڕێ دەکرێت لە بەغداش خۆپیشاندان بۆ پشتیوانی لەو چالاکوانە ئەنجام بدرێت.