سەرۆكی لیژنەی دارایی پەرلەمان: پلە بەرزكردنەوە دەبێت بە یاسا بكرێت نەك ڕێنمایی
SNN-عەلی حەمە سەعید
سەرۆكی لیژنەی دارایی لەپەرلەمانی كوردستان ئاماژە بەوەدەكات: بەمەبەستی دەستكردن بە پلەبەرزركدنەوەی فەرمانبەرانی شارستانی، ڕاپۆرتێكی گشتگیرمان ئاراستەی دەستەی سەرۆكایەتی پەرلەمان كردووە بۆ ئەوەی حكومەت كار بەو پێشنیارانەی ئێمە بكات، هاوكات جەختمان لەوەكردووەتەوە كە پلەبەرزكردنەوەی فەرمانبەران دەبێت بە پێی یاسا بێت نەك ڕێنمایی بۆ دەربكرێت.
زیاد جەبار، سەرۆكی لیژنەی دارایی لە پەرلەمانی كوردستان بەSNNی راگەیاند: نەبوونی پرۆژەیاسای بودجە لەماوەی چەند ساڵی ڕابردوودا گرفتی زۆری بۆ فەرمانبەران دروستكردووە بە تایبەت لە بابەتی پلە بەرزركردنەوەی فەرمانبەرانی ڕاژەی شارستانی، چونكە پلە سەربازییەكان پلەبەرزكردنەوەیان بۆ كراوە، بۆیە بەمەبەستی دەستكردن بە پلەبەرزركدنەوەی فەرمانبەرانی شارستانی، ڕاپۆرتێكی گشتگیرمان ئاراستەی دەستەی سەرۆكایەتی پەرلەمان كردووە بۆ ئەوەی حكومەت كار بەو پێشنیارانەی ئێمە بكات.
ئاماژەی بەوەشكرد، لە ڕاپۆرتەكەماندا جەختمان لەوەكردووەتەوە كە پلەبەرزكردنەوەی فەرمانبەران دەبێت بە پێی یاسا بێت نەك ڕێنمایی بۆ دەربكرێت، ئێمەش خاڵ بە خاڵ سەرنجی خۆمان لەسەر بڕیارەكەی ئەنجومەنی راژە دەربارەی ئەو دوو بابەتە خستەڕوو، هاوكات ئێمە چاوەڕێی ئەوەین حكومەتی هەرێم پرۆژە یاسای بودجەی 2023 رەوانەی پەرلەمان بكات و لەو پرۆژە یاسایەدا ئەو بابەتە چارەسەر بكرێت.
سەرۆكی لیژنەی دارایی لە پەرلەمانی كوردستان ئەوەشی خستەڕوو، گومانمان هەیە بڕیارو رێنماییەكانی ئەنجومەنی وەزیران كە لە رێگای ئەنجومەنی راژەوە دەری كردوون تایبەت بە پلە بەرزكردنەوەی فەرمانبەران و خزمەتی راژەی فەرمانبەران، بۆ جێگرەوەی بودجەیە كە ئەوەش نایاساییە و نابێت بۆ جێگرەوەی پرۆژە یاسای بودجەبێت، چونكە ئەو نووسراوەی ئاراستەی سەرۆكایەتی پەرلەمانمان كردووە، داوامان كردووە هەموو ئەو یاسایانەی كەهەن بۆ رێكخستنی پلە بەرزكردنەوەو راژەی فەرمانبەران جێبەجێبكرێن هەر بڕیار و رێنماییەك لە دەرەوەی ئەو یاسایانەبێت ئێمە بە نایاسایی دەزانین.
