سەرۆکی هەنگاريا سەردانی هەرێم دەکات

SNN
بڕيارە ئەمڕۆ هەينی، کاتلين نۆڤاک سەرۆکی هەنگاريا وەک يەکەم سەرۆکی ئەو وڵاتە سەردانی هەرێمی کوردستان بکات.

بەپێی زانيارييەکانی SNN: سەرۆکی هەنگاريا لە سەردانەکەيدا لەگەڵ بەرپرسانی باڵای هەرێم کۆدەبێتەوە.

هەروەها، نووسینگەی سەرۆکایەتیی هەنگاریا لەبارەی بەرنامەی سەردانەکەوە رايگەياندووە: کاتلين نۆڤاک تا رۆژی شەممە لە عێراق دەمێنێتەوە، بڕیارە لەو ماوەیەدا سەردانی هێزەکانی هەنگاریا بکات کە لە چوارچێوەی هاوپەیمانیی نێودەوڵەتیی دژی داعش لە هەرێمی کوردستان و عێراق جێگیرکراون.

هەنگاریا لە ساڵی 2014ەوە ئەندامی هاوپەیمانیی نێودەوڵەتی دژی داعشە. بەگوێرەی قسەکانی پیتەر سیارتۆ، وەزیری دەرەوەی ئەو وڵاتە، 170 سەرباز و راوێژکاری سەربازی هەنگاریا لە هەرێمی کوردستان و عێراقن و راهێنان بە هێزەکانی پێشمەرگە و هێزە ئەمنییەکانی عێراق دەکەن.