ئەنجومەنی عەرەبی كەركوك دژی جێبەجێكردنی مادەی 140ەو پەرلەمانتارانی یەكێتیش دژیان دەوەستنەوە
SNN-عەلی حەمەسەعید
نوێنەرێی كورد لە ئەنجومەنی نوێنەرانی عێراق ئاماژە بەوەدەكات ئەنجومەنی عەرەبی لە كەركوك بەردەوامن لە چەواشەكارییەكانیان بەرامبەر بە كوردانی كەركوك و ناوچە دابڕاوەكانی دیكەی كوردستان، هاوكات هەموو هەوڵێكیان خستووەتەگەڕ بۆئەوەی مادەی 140ی دەستوور جێبەجێنەكرێت، بەڵام ئێمە لە فراكسیۆنی یەكێتی ڕێگەیان پێنادەین درێژە بە چەواشەكارییەكانیان بدەن.
دیلان غەفور، ئەندامی ئەنجومەنی نوێنەرانی عێراق و نوێنەری كەركوك لە پەرلەمانی عێراق بە SNNی ڕاگەیاند: ئەنجومەنی عەرەبی لە كەركوك لە دژی ماددەی 140ی دەستور كاردەكەن و ڕێگری دەكەن لە جێبەجێكردنی ئەو مادە دەستوورییە، كە لە ئێستا بەهەوڵەكانی یەكێتی كار بۆ جێبەجێكردنی دەكرێت، بەتایبەت دوای سەردانەكەمان بۆ ناوچەی داقوق و بەدوادچوون لەسەر ئەو ڕووداوی هێرشكردنە سەر جوتیارە كوردەكان، ئەنجومەنی عەرەبی لە كەركوك بەیاننامەیەكی پڕ لە چەواشەكاریی بڵاوكردووەتەوە.
ئاماژەی بەوەشكرد، هەر جۆرە هەوڵێك بۆ جێبەجێنەكردنی ماددەی 140 كە ماددەیەكی دەستوورییە، هەوڵێكی نا یاسایی و نادەستوورییە، هاوكات جەختدەكەینەوە لەسەر هەڵوەشانەوەی سەرجەم گرێبەستە كشتوكاڵییەكانی سەردەمی ڕژێمی پێشووی عێراق كە سەرچاوەی كێشەو ناكۆكییەكانن لەو ناوچەیە، هاوكات قەرەبووی عەرەبە هاوردەكان بكرێتەوە لەگەڵ گەڕانەوەیان بۆ ناوچەكانی خۆیان
ئەو نوێنەرەی شاری كەركوك لە پەرلەمانی عێراق ئەوەشی خستەڕوو، سەرجەم بەڵگەكان بەردەستن كە زەویی لە جوتیارانی كورد زەوتكراوەو دراوە بە عەرەبی هاوردە لە سەردەمی ڕژێمی پێشوو، ئەمەش گۆڕینی دیمۆگرافییەو پێویستە سەرجەم بڕیارەكانی ڕژێمی پێشوو هەڵبوەشێنرێنەوە چونكە ئێمە سازش لەم پرسە ناكەین لەگەڵ ئەوەشدا ئێمە هەمیشە پێكەوەژیان و ئاشتیی كۆمەڵایەتی نێوان پێكهاتەكانمان بەلاوە زۆر گرنگ بووەو بەردەوام بەو ئاڕاستەیە كارمان كردووەو بەردەوامیش دەبین.
