بانکی ناوەندی عێراق چەند رێکارێک بۆ رووبەڕووبوونەوەی نرخی بەرزی دۆلار دەگرێتە بەر
دۆلار و دینار
SNN
ئیحسان یاسری جێگری پارێزگاری بانکی ناوەندی عێراق لە لێدوانێکدا بە میدیا عێراقییەکانی راگەیاند: “بانکی ناوەندی لە هەفتەی رابردووەوە چەند رێکارێکی گرتووەتە بەر بۆ پاشەکەوتکردنی دراوی دۆلار، تاوەکو بەهۆی ئەو پاشەکەوتەوە بەهای دۆلاری ئەمریکی لە بازاڕە ناوخۆییەکاندا داببەزێت.”
وتیشی “بەم زووانە چەند رێنماییەک ئاڕاستەی بانکەکانی عێراق دەکەن کە لە پێشتر هەڵبژێردراون، لە پێناو کارکردن لە رۆژانی پشووی فەرمی وەک رۆژەکانی پێنجشەممە و هەینی و شەممە، ئەمەش لە پێناو بەردەوامبوونی فرۆشتنی دۆلار بە خەڵکی، ئەم رێکارانە داواکاری ئەو کەسانەی پێویستیان بە دروای دۆلار هەیە دابین دەکات وەک ئەو کەسانەی گەشت دەکەن یاخود بۆ وەرگرتنی چارەسەر و خوێندن دەچنە دەرەوەی عێراق و لە چەند رۆژی داهاتوو نمایشکردنی دراوی دۆلار بە کاش دەبێتە جێگای رەزامەندی.”
سەبارەت بە دەنگۆی کەمبوونەوەی دراوی دینار لە بانکەکان باسی لەوەکرد، ئەو هەواڵانە دوورن لە راستییەوە و دیناری عێراقی بە رێژەیەکی باش لە بانکەکان و گەنجینەکانی بانکی ناوەندی عێراق بوونی هەیە.
