فارس عیسا: وەزیری دارایی گرفت بۆ ناردنی 400 ملیارەکە دروستدەکات

‏SNN-عەلی حەمە سەعید
نوێنەری حكومەتی هەرێم لە بەغدا ئاماژە بەوەدەكات بابەتی ناردنی 400 ملیار دینارەكە لە ئەنجومەنی وەزیرانی عێراق بڕیاری لەبارەوە دراوە و نوسراویش ئاراستەی وەزارەتی دارایی كراوە بۆ خەرجكردنی تەنها بڕیاری وەزارەتی دارایی ماوە بە ناردنی پارەكە و بەدڵنیاییەوە ئەو بڕیارەش دەردەچێت.

فارس عیسا، بەرپرسی نوێنەرایەتی حكومەتی هەرێم لە بەغدا بە SNNی ڕاگەیاند: بابەتی ناردنی 400 ملیار دینار بۆ هەرێمی كوردستان بڕیاری كۆتایی لەبارەوە دراوە و لە نوسینگەی سەرۆك وەزیرانی عێراقیشەوە نوسراو ئاراستەی وەزارەتی دارایی كراوە بە خەرجكردنی ئەو بڕە پارەیە، بەڵام تا ئێستا لەلایەن وەزارەتی داراییەوە بڕیاری خەرجكردنی نەدراوە و بەدڵنیایشەوە لەلایەن وەزارەتی دارایەوە ئەو بڕیارەش دەدرێت و ئەو بابەتە یەكلایی دەكرێتەوە.

ئاماژەی بەوەشكرد، لەكابینەكانی پێشووش بەهەمان شێوە لەلایەن وەزیری دارایی گرفت بۆ ناردنی ئەو 200 ملیار دینارە دروستدەكرا، بەڵام دواجار گرفتەكان چارەسەر دەكرێن بەتایبەت كە وابڕیارە شاندێك لە حكومەتی هەرێمەوە سەردانی بەغدا بكەن و لەگەڵ لایەنە پەیوەندیدارەكانی عێراق ئەو بابەتەش گفتوگۆی لەبارەوە بكرێت.

وتەكانی ئەو نوێنەرەی حكومەتی هەرێم لەكاتێكدایە كە لەمانگی ڕابردووەوە ئەنجومەنی وەزیرانی عێراق بڕیاری لەبارەی خەرجكردنی بڕی 400 ملیار دیناری بۆ مانگەكانی 11 و 12ی ساڵی ڕابردوو دەركردووە، بەڵام تا ئێستا لەلایەن وەزیری دارایی عێراقەوە ئامادە نییە ئەو بڕیارە جێبەجێ‌ بكات، بەوتەی وزەیری دارایی عێراقیش هیچ بڕگەیەكی یاسایی نییە پاڵپشتی ناردنی ئەو بڕە پارەیە بكات بۆ هەرێمی كوردستان.

پێشتر، کاروان یاروەیس ئەندامی ئەنجومەنی نوێنەرانی عێراق لە چاوپێکەوتنێکی تەلەفیزیۆنیدا رایگەیاند: پێشبینی دەکەم حکومەتی عێراق 10ی ئەم مانگە 400 ملیارەکە بۆ هەرێم بنێرێت، سەبارەت بە هۆکاری دواکەوتنیشی وتی “وەزیری دارایی دەیەوێت خۆی لە بەرپرسیارێتی ناردنی ئەو پارەیە لابدات و بکەوێتە ئەستۆی سەرۆکوەزیران”.