“یەكێتیی نیشتمانی سورە لەسەر ئەنجامدانی هەڵبژاردنێكی دوور لە ساختەكاری”

SNN-عەلی حەمە سەعید

جێگری سەرۆكی فراكسیۆنی یەكێتیی نیشتمانیی كوردستان لە پەرلەمانی كوردستان جەخت لەوەدەكاتەوە كە یەكێتی ئامادەیە بچێتە هەر هەڵبژاردنێكەوە كە دوور بێت لە ئەنجامدانی ساختەكاری بۆ ئەومەبەستەش پرۆژەیاسایەكمان ئامادەكردووە كە لە 26 مادە پێكدێت و تایبەت بە هەمواری پرۆژەیاسای هەڵبژاردن.

لوقمان وەردی، جێگری سەرۆكی فراكسیۆنی یەكێتیی نیشتمانیی كوردستان لە پەرلەمانی كوردستان بە SNNی ڕاگەیاند: یەكێتیی نیشتمانیی كوردستان هەمیشە لەگەڵ ئەنجامدانی هەڵبژاردندا بووە لەوادەی یاسایی خۆیدا، بۆیە ئێستاش ئێمە سوورین لەسەر ئەنجامدانی هەڵبژاردنی پەرلەمانی كوردستان لە نزیكترن وادەدا.

ئاماژەی بەوەشكرد، لە فراكسیۆنی یەكێتی لە پەرلەمانی كوردستان پێشتر پڕۆژەیاسایەكمان پێشكەشكردووە كە تایبەتە بە هەمواركردنەوەی یاسای هەڵبژاردن و لە 26 ماددە پێكهاتووە، بۆیە ئێمە پێمان وایە ئەم بابەتە پێویستی بە دانیشتن و كۆبوونەوەی زیاتری نێوان لایەنەكان هەیە تا گفتوگۆی جدی لەبارەوە بكرێت

جێگری سەرۆكی فراكسیۆنی یەكێتی لە پەرلەمانی كوردستان جەختی لەوەشكردەوە، ئێمە لە فراكسیۆنی یەكێتی سوورین لەسەر ئەنجامدانی هەڵبژاردن و هەمواركردنەوەی یاسای هەڵبژاردن، هاوكات ئەنجامدانی هەڵبژاردنێكی دوور لە ساختەكاری خواستی ئێمە و هەموو هاووڵاتیانی هەرێمی كوردستانە.

وتەكانی جێگری سەرۆكی فراكسیۆنی یەكێتی لەكاتێكدایە كە رۆژی دووشەممە دەستەی سەرۆكایەتی پەرلەمان لەگەڵ سەرۆك فراكسیۆنەكانی پەرلەمان كۆبوونەوەیەكی ڕاوێژكارییان لەبارەی هەمواری یاسای هەڵبژاردن و كاركرادنەوەی كۆمسیۆنی باڵای هەڵبژاردن و ڕاپرسی هەرێم ئەنجامدا.