زانیاری نوێ لەبارەی بەرزبوونەوەی نرخی دۆلار ئاشکرا دەکرێت

SNN
بەڕێوەبەری پێشووتری بانکی رافیدەین زانیاری نوێ لەبارەی بەرزبوونەوەی نرخی دۆلار بەرامبەر بە دیناری عێراقی ئاشکرا دەکات و باس لەوەش دەکات، ” هەر دۆلارێک لە هەر کوێ بجوڵێندرێت، ئەمریکا ئاگادارە”.
زیا ئەلخەیون بەڕێوەبەری بانکی رافیدەین لە لێدوانێکدا رایگەیاندووە، “بانکی ناوەندی بەرپرسیار نییە لە مامەڵەکردن بە دۆلار و هەموو دۆلارەکان کە لە ئەمریکاوە دێن بەناوی وەزارەتی داراییەوە تۆمار دەکرێن و کۆنتڕۆڵ و مەرج هەیە بۆ دەرهێنانی پارە’.
راشیگەیاندووە: “بازرگانە گەورەکان قۆرغکارییان ئەنجامداوە لە کڕین و فرۆشتنەوەی دۆلاردا بۆ ئەوەی لە رێگەی خستنە سەر هەژمارە تایبەتییەکانیان سوودێکی زیاتر بەدەستبهێنن”.
وتیشی، “پارەی نەوت نایەتە راستەوخۆعێراقەوە و بەڵکو دەچێتە بانکەکانی وەک جەی پی مۆرگان و بەشی ریسێرڤ بانکی فیدراڵی ئەمریکا، هەر بۆیە هەر دۆلارێک لە هەر کوێ بجوڵێندرێت، ئەمریکا ئاگادارە.”
لەبەشێکی دیکەی قسەکانیدا ئەلخەیون ئاماژەی بە رۆڵی بانکە ئەهلییەکان کردووە لە ناجێگیری نرخی دۆلار و رایگەیاندووە: ” نزیکەی 72بانکی ئەهلی هەیە، و تەنها ناون و نازاندرێت ئەو هەموو پارەیە لە بانکە حکومییەکان وەریدەگرن بۆ کوێی دەبەن”.
ئاماژەی بەوەشکردووە، “هەندێک لە بازرگانان سوودیان لەم بەرزبوونەوەیەی دۆلار و بارودۆخی ئابووری وەرگرتووە، بە جۆرێک ئەگەر دۆلار بە رێژەی 10% بەرزبووەوە، ئەوا بە بیانووی هاوردەکردنی کەرەستە لە دەرەوەی وڵاتەوە بە رێژەی 50% لەسەر هاووڵاتیان نرخەکەی زیاد دەکەن، بۆیە بارگرانی دەکەوێتە سەر هاووڵاتیان”.