“هێزه كوردییه‌كان هیچ پلانێكیان نییه بۆ كشانه‌وه له به‌غدا”
د. مه‌حمود عوسمان، چاودێرى دۆخى عێراق و هه‌رێمى كوردستان | فۆتۆ: SNN
SNN
سیاسه‌تمه‌دارێكى كورد رایده‌گه‌یه‌نێت، هێزه كوردییه‌كانى هه‌رێمى كوردستان هیچ پلانێكیان نییه بۆ كشانه‌وه له به‌غدا به‌هۆى بڕیاره‌كانى دادگاى فیدراڵییه‌وه، ده‌شڵێت: “كشانه‌وه بژارده‌یه‌كى زۆر دووره”.
هه‌فته‌ى پێشوو دادگاى فیدراڵى عێراق له‌سه‌ر سكاڵایه‌كى په‌رله‌مانتار مسته‌فا سه‌ند، بڕیاریدا ناردنى 400 ملیار دیناره‌كه‌ى بۆ حكومه‌تى هه‌رێم رابگرێت. ئه‌مه‌ش كاردانه‌وه‌ى به‌دواى خۆیدا هێناو و حكومه‌تى هه‌رێم به فه‌رمى له‌ڕێگه‌ی به‌یاننامه‌یه‌كه‌وه رایگه‌یاند، “بڕیاره‌كه نایاساییه”.
له‌باره‌ى ئه‌گه‌رى كشانه‌وه‌ى كوتله كوردییه‌كان به‌هۆى بڕیاره‌كه‌وه مه‌حمود عوسمان، سیاسه‌تمه‌دارى كورد به میدیاكانى عێراق راگه‌یاندووه، “هیچ نیاز و پلانێك نییه بۆ كشانه‌وه له حكومه‌تى ناوه‌ندى به‌هۆى بڕیاره‌كه‌ى دادگاى فیدراڵییه‌وه له‌لایه‌ن كوتله كوردییه‌كان”.
وتیشى: “بژارده‌ى كشانه‌وه له پرۆسه‌ى سیاسى بژارده‌یه‌كى زۆر دووره و ئه‌گه‌رى روودانى زۆر كه‌مه”.
به وته‌ى مه‌حمود عوسمان، “هه‌ولێر له چه‌ند رۆژى داهاتوودا گفتوگۆكانى له‌گه‌ڵ به‌غدا ده‌ستپێده‌كات به‌مه‌به‌ستى دۆزینه‌وه‌ى رێگه‌چاره‌ى یاسایی بۆ ناردنى پاره بۆ حكومه‌تى هه‌رێم بۆ مووچه‌ى فه‌رمانبه‌ران”.
