وەزارەتی كشتوكاڵ بڕی چوار ملیار دیناری بۆ قەلاچۆكردنی مێرووە زیان بەخشەكان تەرخانكردووە

SNN-عەلی حەمە سەعید

لەگەڵ نزیك بوونەوە لە وەرزی دروێنەی بەرهەمی گەنمی ئەمساڵی جوتیاران، بەڵام لە سنووری پارێزگای هەڵەبجە و دەشتی شارەزوور بەهۆی بڵاوبوونەوەی مێرووی سن و كولـلە ژمارەیەك لە جوتیاران زیان بەبەرهەمەكانیان گەیشتووە و بۆ كۆنترۆڵكردنی ئەو مێرووە زیانبەخشانەش بڕی چوار ملیار دیناری تەرخانكردووە و هەر بەڕیچوەبەرایەتییەكی كشتوكاڵیش پشكی خۆی بۆ دابینكراوە.

حەمەكەریم ئەحمەد، یەكێك لە جوتیارانی سنووری پارێزگای هەڵەبجە بە SNNێ‌ ڕاگەیاند: لەگەڵ ئەوەی لەمساڵدا بەرهەمی گەنم بەراورد بە ساڵانی ڕابردوو لەڕووی ڕێژەوە لە ئاستێكی زۆر باشدایە و دوو هێندە زیادیكردووە، بەڵام لەمساڵدا بەڕێژەیەكی زیاتر مێرووی سن و كولـلە بڵاوبووەتەوە و زیانی لەبەرهەمی گەنمی جوتیاران داوە.

ئاماژەی بەوەشكرد، ئێستاش كات لەبەردەستدا ماوە كە لایەنە پەیوەندیدارەكان بتوانن هاوكاری جوتیاران بكەن بە دابینكردنی دەرمانی قڕكەر بۆ لەناوبردنی ئەو مێرووە زیانبەخشانە بەتایبەت سن و كولـلە، بەڵام بەداخەوە لەساڵانی ڕابردوو بە بیانووی قەیرانی دارایی نەتواندراوە هاوكاری جوتیاران بكرێت و لەسەر شاخی خۆمان دەرمان و پێداویستی كشتوكاڵیمان دابینكردووە.

لەبەرامبەر داواكاری جوتیارانی سنوری پارێزگای هەڵەبجە SNN پەیوەندی بە وتەبێژی وەزارەتی كشتوكاڵی حكومەتی هەرێم كرد ئەوەی ڕاگەیاند كە وەزارەتی كشتوكاڵ بۆ ئەمساڵ بڕی چوار ملیار دیناری تەرخانكردووە بۆ كڕینی دەرمانی قڕكەر بەتایبەت بۆ لەناوبردنی مێرووی سن و كوللە و ئەو بڕە پارەیەش بەگوێرەی ژمارەی جوتیاران و ڕووبەری زەوی كشتوكاڵی بەسەر بەڕێوەبەرایەتی گشتی كشتوكاڵی پارێزگاكاندا دابەشكراوە.