بڕیارە هەناردەکردنی نەوتی هەرێمی کوردستان لە سبەینێوە دەستپێبکاتەوە

SNN

ئامانج رەحیم، سکرتێری ئەنجومەنی وەزیرانی هەرێمی کوردستان ئەمشەو لە پەیامێکدا بڵاویکردەوە، تا ئێستا لە ڕێکەوتننامەی هەرێم و حکومەتی فیدڕاڵ چوار بڕگە جێبەجێکراوە، لەوانە “مفاتحەکردنی بۆتاشی تورکی لەلایەن کۆمپانیای سۆمۆ بۆ دەستپێکردنەوەی هەناردەی نەوتی هەرێم سبەینێ لە ڕێگای بۆری نەوتی کەرکوک-جەیهان وفرۆشتنی لە ڕێگای کۆمپانیای سۆمۆ”.

ئاماژەی بەوەشکردوە، سۆمۆ لەگەڵ کڕیارانی پێشووی نەوتی هەرێمی کوردستان سەبارەت بە میکانیزمیی نوێی فرۆشتنی نەوتی هەرێم رێککەوتنی کردوە، هەروەها رەزامەندی بانکیی ناوەندیی عێراق بۆ کردنەوەی هەژماری بانکی لە ئیماراتی عەرەبی یەکگرتو بۆ ئیداعکردنی پارەی داهاتی نەوتی هەرێمی کوردستان.

سکرتێری ئەنجومەنی وەزیران دەڵێت، “ئەنجومەنی وەزیرانی عێراق لە دوا کۆبونەوەی خۆی لیژنەیەکی وەزاری کە لە وەزیرانی (دارایی، پلاندانان، شارەوانی وئاوەدانکردنەوە) و فەرمانگەی قانونی ئەنجومەنی وەزیرانی بەغدا راسپاردوە بۆ داڕشتنەوەی هەردو بڕگەی مادەی 12 لە پڕۆژە یاسای بودجەی عێراق بە ئاڕاستەی لابردنی کۆتوبەندەکانی سەر ناردنی بەشە بودجەی مانگانەی هەرێم”.