“ژمارەی فەرمانبەرانی هەرێم لە پرۆژەیاسای بودجە بە نزیكەی 682 هەزار فەرمانبەر دیاریكراوە”
جەمال کۆچەر
SNN-
ئەندامێكی لیژنەی دارایی لە پەرلەمانی عێراق ئاماژە بەوەدەكات ژمارەی فەرمانبەرانی هەرێم لە پرۆژەیاسای بودجەی گشتیی عێراق بە نزیكەی 682 هەزار فەرمانبەر دیاریكراوە، کە ئەوەش کەمترە کەو ژمارەیەی لای حکومەتی هەرێم تۆمار کراون.
د.جەمال كۆچەر، ئەندامی لیژنەی دارایی لە پەرلەمانی عێراق بەSNNی ڕاگەیاند: گفتوگۆكانی پرۆژەیاسای بودجەی گشتی بەرەو كۆتایی دەچن بەتایبەت ئەو بڕگەو مادانەی كە مابوون و پەیوەندیشیان بە پشكی كوردەوە هەبوو پێدەچێت ئەمڕۆ بەتەواوی كۆتاییان پێبێت، بەڵام ئەوەی جێگای نیگەرانییە ئەوەیە كە كۆی ژمارەی فەرمانبەرانی هەرێمی كوردستان كە لە حكومەتی فیدراڵیدا تۆماركراوە، 681 هەزار و 979 فەرمانبەرە، ئەوەش ژمارەیەكی كەمترە لە ژمارەی ئەو فەرمانبەرانەی لای حكومەتی هەرێم تۆماركراون كە ژمارەیان زیاتر لە یەك ملیۆن فەرمانبەرە.
ئاماژەی بەوەشكرد، لە پرۆژەیاسای بودجەی عێراق ژمارەی ئەوانەی لێ دەركراوە كە لە لیوا هاوبەوشەكان و پاسەوانی سنوور لە هەرێمی كوردستاندا دادەمەزرێندرێن لەگەڵ ئەوەی ئەو هێزانەی مووچە لە حكومەتی فیدراڵی وەردەگرن، بەوەش ژمارەی فەرمانبەرانی هەرێمی كوردستان زیاتر كەم دەبێتەوە.
