لەسەرئاستی عێراق و هەرێمی كوردستان، سلێمانی لە بەرهەمهێنانی گەنم لە پلەی یەكەمدایە

SNN-عەلی حەمەسەعید

ڕاوێژكارێكی وزارەتی بازرگانی و پیشەسازی حكومەتی هەرێم ئاماژە بەوەدەكات، لەسەرئاستی عێراق و هەرێمی كوردستان بەرهەمی گەنمی جوتیارانی پارێزگای سلێمانی لە پلەی یەكەمدایە و زۆرترین بەرهەمی گەنمی ڕادەستكراو بە سایلوكان، ئەوەش بە وتەی وتەبێژی وەزارەتی كشتوكاڵی حكومەتی عێراقی كە بریتیبووە لە 160 هەزار تۆن گەنم.

وەسفی خەلیل، ڕاوێژكاری وەزارەتی بازرگانی و پیشەسازی حكومەتی هەرێم بە SNNی ڕاگەیاند: لەدواین لیدوانی وتەبێژی وزارەتی بازرگانی عێراق ئەوەی خستووەتەڕوو، كە جوتیارانی پارێزگای سلێمانی ڕوڵی پیشڕەوی خۆیان بینی سەبارەت بە بەرهەم هینانی زۆرترین بەرهەمی گەنمی ڕادەست كراو بە سایلوكانی، كە بریتیبووە لە 160 هەزار تۆن گەنم.

ئاماژەی بەوەشكرد، ئەمساڵ لە سلێمانی توانراوە هەزار و 250 پڕوژەی كیڵگە پەلەوەری دروست بكرێت، بەرهەمێكی یەكجار زۆریان ھەیە، كە مەزەندە دەكرێت بە دوو هێندەی پێویستی شارەكە ئەمەش بەڵگەی ئەوەیە ڕۆژ بەڕۆژ پارێزگای سلێمانی ڕۆڵی پێشەنگی خۆی دەبینێت لە دابینكردنی ئاسایشی خۆراك نەك تەنها بۆ خودی شارەكە، بەڵكو بۆ هەموو عێراق.

ئەو ڕاوێژكارەی وەزارەتی بازرگانی و پیشەسازی حكومەتی هەرێم ئەوەشی خستەڕوو، عێراق بڕی وەرگرتنی گەنمی جوتیارانی هەرێمی لە 350 هەزار تۆنەوە زیاد كرد بۆ 500 هەزار تۆن و هەروەها، لەمەودوا ڕێگە دەكرێتەوە بۆ ئەوەی جوتیارانی هەرێم بەرهەمە كشتوكاڵیەكانیان بۆ ناوەڕاست و باشوری عێراق ببەن ئەوەش دوای هەوڵەكانی وەزارەتی كشتوكاڵی حكومەتی هەرێم بۆ چارەسەركردنی گرفتەكانی جوتیارانی هەرێم.