راوێژكارى دارایی سوودانى: له چه‌ند رۆژى داهاتوودا نرخى دۆلار به‌رامبه‌ر دینار داده‌به‌زێت
دراوى 100 دۆلارى ئه‌مریكى | فۆتۆ: Dennis Hallinan / Alamy
SNN
راوێژكارى دارایی سه‌رۆكوه‌زیرانى عێراق ئاشكرایده‌كات، له رۆژانى داهاتوودا نرخى دۆلار به‌ره‌به‌ره روو له دابه‌زین ده‌كات به‌رامبه‌ر دینارى عێراقى.
به‌ره‌به‌یانى رۆژى دووشه‌ممه 12ى حوزه‌یران، پرۆژه یاساى بودجه‌ى عێراق له‌نێو ئه‌نجوومه‌نى نوێنه‌ران په‌سه‌ند كرا، له پرۆژه یاساكه‌دا نرخى 100 دۆلار به 130 هه‌زار دینار دیاریكراوه.
ئه‌مڕۆ چوارشه‌ممه 14ى حوزه‌یران، مه‌زهه‌ر محه‌مه‌د ساڵح، راوێژكارى دارایی محه‌مه‌د شیاع سودانى، سه‌رۆكوه‌زیرانى عێراق به میدیاكانى عێراقى راگه‌یاند، “یه‌كێك له هۆكاره‌كانى دانه‌به‌زینى به‌هاى دۆلار به‌رامبه‌ر دینارى عێراقى بریتیه له دره‌نگكه‌وتنى په‌سه‌ندكردنى پرۆژه‌یاساى بودجه‌ى عێراق، ئه‌مه سه‌ره‌ڕاى ئه‌وه‌ى له بازاڕدا هێشتاش خواست له‌سه‌ر دۆلار زۆره”.
له وه‌ڵامى ئه‌و پرسیاره‌ى ئایا كه‌ى نرخى دۆلار ده‌ستبه دابه‌زین ده‌كات به‌رامبه‌ر دینار و له‌و نرخه نزیك ده‌بێته‌وه كه له پرۆژه‌یاساى بودجه‌دا بۆى ته‌رخانكراوه؟ مه‌زهه‌ر محه‌مه‌د ساڵح ئاشكراشیكرد، “له رۆژانى داهاتوودا نرخى دۆلار ده‌ستبه دابه‌زین ده‌كات تاوه‌كو ده‌گاته ئه‌و نرخه فه‌رمیه‌ى كه له بودجه‌دا بۆى دیاریكراوه”.
به وته‌ى مه‌زهه‌ر محه‌مه‌د ساڵح، له ئێستادا دۆخى دارایی عێراق له باشترین ئاستدایه، چونكه خاوه‌نى یه‌ده‌گێكى به‌هێزه له دراوى بیانى.
