سه‌رۆككۆمار واژووى له‌سه‌ر پرۆژه‌یاساى بودجه‌ى عێراق كرد
د. له‌تیف ڕه‌شید، سه‌رۆككۆمارى عێراق | فۆتۆ: سه‌رۆكایه‌تى كۆمار
SNN
كه‌مێك له‌مه‌وبه‌ر د. له‌تیف ڕه‌شید، سه‌رۆككۆمارى عێراق واژووى له‌سه‌ر پرۆژه‌یاساى بودجه‌ى عێراق بۆ ساڵه‌كانى 2023، 2024 و 2025 كرد.
به‌پێى یاسا پرۆژه‌كه ده‌نێردرێت بۆ هه‌ردوو وه‌زاره‌تى پلاندانان و دارایی، دواتر له رۆژنامه‌ى وه‌قایعى عێراق بڵاوده‌كرێته‌وه و پاشان ده‌چێته بوارى جێبه‌جێكردنه‌وه.
رۆژى 12ى حوزه‌یران، ئه‌نجوومه‌نى نوێنه‌رانى عێراق پرۆژه‌یاساى بودجه‌ى به كۆى ده‌نگ په‌سه‌ند كرد. پاش زیاتر له 7 رۆژ گفتوگۆى چڕ و چه‌ندین جار وه‌ستانى ده‌نگدان له‌سه‌ر پرۆژه‌یاساكه به‌هۆى ناكۆكییه‌كانه‌وه.
له‌نێو پرۆژه‌یاساكه‌دا پشكى هه‌رێمى كوردستان به 12.6٪ دیاریكراوه، هه‌رێمى كوردستان ناچار كراوه كه 400 هه‌زار به‌رمیل نه‌وت له‌ژێر چاودێرى سۆمۆدا هه‌نارده بكات و نیوه‌ى داهاتى نانه‌وتى خۆشى راده‌ستى عێراق بكات. له هه‌موو ئه‌مانه‌ش زیاتر، له پرۆژه‌یاساكه‌دا هاتووه، پاره‌ى داهاتى نه‌وتى و نا نه‌وتى هه‌رێم ده‌چێته هه‌ژمارێكى بانیكه‌وه له عێراق، دواتر پاره‌كه ده‌خرێته هه‌ژمارێكى ترى بانكى له بانكێكى باوه‌ڕپێكراوى بانكى نیشتمانى عێراق، پاشان له‌و بانكه‌وه ده‌درێت به حكومه‌تى هه‌رێم.
