نوێترین زانیاری لەبارەی دەستبەكار بوونی دوو لیوا هاوبەشەكەی پێشمەرگەو سوپای عێراق
دیمهنى ئۆپراسیۆنێكى هاوبهشى هێزهكانى پێشمهرگه و سوپاى عێراق | فۆتۆ: AP
SNN-عەلی حەمە سەعید
سەرۆكی فراكسیۆنی یەكێتی لە ئەنجومەنی نوێنەرانی عێراق ئاماژە بەوەدەكات، لە ئایندەیەكی نزیكدا دوو لیوا هاوبەشەكەی هێزی پێشمەرگە و سوپای عێراق دەستبەكاردەبن و دەبنە بەشێك لە سیستەمی بەرگریی عێراق و مووچە و بودجەكەشیان لەسەر حكومەتی عێراقی دەبێت و لە پرۆژەیای بودجە پشكیان بۆ تەرخانكراوە.
هەرێم كەمال ئاغا، سەرۆكی فراكسیۆنی یەكێتی لە ئەنجومەنی نوێنەرانی عێراق بەSNNی ڕاگەیاند:دوای ئەوەی ماوەیەكی زۆرە لایەنە پەیوەندیدارەكانی نێوان حكومەتی هەرێم و حكومەتی عێراقی سەرقاڵی پێكهێنانی لیوایەكمی هاوبەشی هێزی پێشمەرگەو سوپای عێراقن، لەئێستادا كاروبارەكانی دەستبەكار بوونی ئەو دوو لیوا ھاوبەشەكەی پێشمەرگە و سوپای عێراق بەكۆتا هاتووە و دەبنە بەشێكن لە سیستەمی بەرگریی عێراق.
ئاماژەی بەوەشكرد، لەڕووی ئیداری و كارگێڕیەوە ئەو دوو لیوا هاوبەشە مووچە و بودجەیان لەلایەن حكومەتی عێراقییەوە بۆ دابیندەكرێت، هاوكات لە پرۆژەیاسای بوودجەدی گشتی عێراقیشدا پشكی ئەو دوو لیوا هاوبەشە لە مووچە و بودجەكانیان دیاریكراوە و لە پەرلەمان دەنگیان لەسەردراوە.
سەرۆكی فراكسیۆنی یەكێتی لە ئەنجومەنی نوێنەرانی عێراق ئەوەشی خستەڕوو، لە ئایندەیەكی نزیكدا مووچە بۆ ئەو دوو لیوا هاوبەشە خەرجدەكرێت و دوای ئەوەش راستەوخۆ دەستبەكاردەبن و ئەركەكانیان بۆ دیاری دەكرێت كە زیاتر پاراستنی ئەو ناوچانەیە كە بۆشایی ئەمنی تیادا دروستبووە و مەترسی بوونی چەكدارانی داعشیان تیادا ماوە.
