دابه‌زینى به‌هاى لیره كارگه‌ریی ئه‌رێنى ده‌بێت له‌سه‌ر ئابوورى هه‌رێمى كوردستان
دراوى 25 هه‌زار دینارى عێراق | فۆتۆ: SNN
SNN
شاره‌زایه‌كى ئابوورى رایده‌گه‌یه‌نێت، داڕمانى به‌هاى لیره‌ى توركى ده‌رفه‌تێكى باشه بۆ ئابوورى كوردستان، ده‌شڵێت: “پێویسته بازرگانانى كورد به لیره مامه‌ڵه بازرگانیه‌كانیان له‌گه‌ڵ توركیا بكه‌ن”.
ئه‌مڕۆ چوارشه‌ممه 19ى ته‌مموز، فه‌رمان حه‌سه‌ن، شاره‌زاى ئابوورى رایگه‌یاند، “به‌هاى لیره‌ى توركى رۆژ به رۆژ زیاتر داده‌به‌زێت، ده‌كرێت ئه‌م دابه‌زینه ده‌رفه‌تێكى باش بێت بۆ ئابوورى هه‌رێمى كوردستان، چونكه زۆرترین هه‌نارده‌ى له وڵاتى توركیاوه‌یه”.
له‌باره‌ى ورده‌كارى ئه‌و كارگه‌رییه ئه‌رێنیه‌ى كه ده‌كرێت دابه‌زینى لیره‌ى توركى له‌سه‌ر هه‌رێم هه‌یبێت، ئه‌و شاره‌زا ئابورییه ئاماژه به‌وه‌ده‌كات، “پێویسته بازرگانانى هه‌رێم هه‌وڵبده‌ن له‌برى دۆلار مامه‌ڵه به لیره‌ى توركیه‌وه بكه‌ن، چونكه به‌هاكه‌ى داڕماوه، ئه‌مه ده‌بێته هۆكارى دروستبوونى كارگه‌ریی ئه‌رێنێ له‌سه‌ر ئابوورى هه‌رێم”.
به وته‌ى ئه‌و شاره‌زا ئابووریه، “یه‌كێك له كارگه‌رییه ئه‌رێنیه‌كان بریتیه له هه‌رزانبوونى نرخى گه‌شتوگوزار، هاتنى كرێكارى تورك بۆ هه‌رێم و هه‌رزانبوونى كاڵا”.
