ئەمڕۆ پزیشکانی سلێمانی و هەڵەبجە بایکۆتی دەوام دەکەن

SNN

بە هۆی دواکەوتنی مووچەوە، وا بڕیارە ئەمڕۆ سێشەممە، پزیشکانی سلێمانی و هەڵەبجە دەست بە بایکۆتکردنی دەوام بکەن.

پزیشکانی نیشتەجێی خولاو و پزیشکانی پلەبەند ڕاگەیەندراوێکی هاوبەشیان بڵاوکردەوە و تێیدا هاتووە: ئێمە وەک زیاتر لە 600 پزیشکی گەنجی سنووری پارێزگای سلێمانی و پارێزگای هەڵەبجە و ئیدارە سەربەخۆکان و شار و شارۆچکەکانی سنووری سلێمانی، بەرواری 1ی ئاب، لە پاش تێپەڕبوونی زیاتر لە 44 ڕۆژ بەسەر دابەشکردنی کۆتا مووچە و ناڕوونی چارەنووسی مووچەی مانگەکانی 6 و 7، بریارماندا لەپای بێباکی لایەنە پەیوەندیدارەکان لە دواکەوتنی مووچەکانمان، دەوام بایکۆت دەکەین تاوەکو داواکاریەکانمان جێبەجی دەکرێت.

ئەوەشیان خستەڕوو کە دەست بەجێ دابەشکردنی مووچەی مانگەکانی 6 و 7 نەکرێت و دابەشکردنی مووچە ڕێکنەخرێتەوە، لە بایکۆتکردنی دەوام بەردەوام دەبن.

ڕاشیانگەیاند بایکۆتکردنەکە سەرجەم نەخۆشخانەکانی ناو شاری سلێمانی و دەرەوەی سلێمانی فریاکەوتنەکانی ناو شار و دەرەوەی شار، بنکە و مەڵبەندە تەندروستیەکان و سەنتەرەکان دەگرێتەوە.