زانکۆی سلێمانی پلەی یەکەمی بەدەستهێنا

SNN-

زانکۆی سلێمانی یەکەمی سەر ئاستی زانکۆ حکومییەکانی هەرێم و چوارەمی عێراقی بەدەستهێنا

سەرۆکایەتی زانکۆی سلێمانی بڵاویکردووەتەوە، بەپێی رانکینی دامەزراوەی سیماگۆ بۆ ساڵی (2023)، کە لەسەر بنەماکانی (توێژینەوە، نوێکاریی و داهێنان، کاری پێکەوەیی) ئەنجامدراوە، زانکۆی سلێمانی پلەی یەکەمی سەر ئاستی زانکۆ حکومییەکانی هەرێم و پلەی چوارەمی سەر ئاستی زانکۆکانی عێراقی بەدەستهێناوە و وەک هەمیشە پێشەنگە.

لە راگەیەندراوەکەی سەرۆکایەتی زانکۆی سلێمانیدا هاتووە کە هەر بەپێی رانکینەکەی سیماگۆ، زانکۆی سلێمانی لەسەر ئاستی عێراق پێشەنگە، بەجۆرێک لە بواری پزیشکی گشتی و ئەندازیاریی یەکەمی عێراقە، هەروەها لە بواری کیمیا و پزیشکی ددان دووەمی وڵاتەکەیە و لەبواری زانستیش سێهەمە، ئەمە جگەلەوەی لە بواری پزیشکی ڤێتێرنەری 12 هەمینی عێراقە.

سەرۆکایەتی زانکۆی سلێمانی بەم بۆنەیەوە پیرۆزبایی لە مامۆستایان و ستافی ئەکادیمی و خوێندکاران و فەرمانبەران دەکات و بەڵێندەدات بە هەوڵی هەمووان (زانکۆی دایک) بەرەو پێشەنگتر بەرن و ناوی لە جیهاندا بدرەوشێتەوە و گرێدراوی کۆمەڵگەی ناوخۆییش بێت.