نوێترین زانیاری لەبارەی وردبینی ژمارەی مووچەخۆرانی هەرێم لەلایەن بەغداوە

SNN-عەلی حەمە سەعید

ماوەی چەند ڕۆژێكە لیژنەیەكی تایبەت لە دیوانی چاودێری دارایی عێراق هاتوونەتە هەریمی كوردستان و بەهەماهەنگی لەگەڵ دیوانی چاودێری دارایی هەرێم دەستیان بە وردبینی كردووە بۆ ژمارەی فەرمانبەران و خانەنشینان، هاوكات كاری سەرەكی لیژنەكەش بۆ ئەوەیە كە لەحاڵەتی گواستنەوەی مووچەی فەرمانبەرانی هەرێم بۆ سەربەغدا پشت بەو لیستانە ببەسترێت.

بەگوێرەی زانیارییەكانی SNNكە لەبەرپرسێكی وەزارەتی دارایی وەریگرتوون ئەوەخراوەتەڕوو، ئەو لیژنەیەی كە لەلایەن دیوانی چاودێری عێراقەوە ڕەوانەی هەرێم كراوە بەردەوامن لە كارەكانیان و وەزارەت بە وەزارەت دەستیان گردووە بە وردبینی كردنی ناوی فەرمانبەران و خانەنشینان و تا ئێستا هیچ گرفتێك نەهاتووەتە پێش بۆ كارەكانی ئەو لیژنەیە كە بەهەماهەنگی لەگەڵ دیوانی چاودێری دارایی هەرێم كارەكانیان ئەنجام دەدەن.

ئاماژەی بەوەشكرد، كارەكانی ئەو لیژنەیە دەبێت لە ماوەی 30 رۆژدا وردبینی لە ژمارەی فەرمانبەران و خانەنشینان و ئەو كەسانە بكرێت كە تۆڕی پاراستنی كۆمەڵایەتی دەیانگرێتەوە، لەگەڵ بڕی مووچەكانیان بەگوێرەی ئەو لیستەی كە رادەستی وەزارەتی دارایی عێراق كراوەز

هەر بە گوێرەی زانیارییەكانی SNN ئامانجی سەرەكی لە سەردانی ئەو لیژنەیەو وردبینی كردنی لیستی فەرمانبەران و خانەنشینانی هەرێم بۆ ئەوەیە كە لە حاڵەتی گواستنەوەی مووچەی فەرمانبەرانی هەرێم بۆ بەغدا، لایەنە پەیوەندیدارەكانی عێراق پشت بەو لیستە ببەستن كە لەلایەن دیوانی چاودێری دارایی عێراقەوە وردبینی بۆ كراوە.