یەكێتی دەنگەكانی لە پارێزگای نەینەوا زیاد دەكات و بڕیاری تاكە حزبی كۆتایی دێت

SNN-عەلی حەمە سەعید
سەرۆكی هاوپەیمانی یەكێتی خەڵكی نەینەوا ئاماژە بەوەدەكات لەم هەڵبژاردنەی ئەنجومەنی پارێزگاكان یەكێتیی نیشتمانی كوردستان دەنگەكانی بەڕێژەیەكی زۆر بەرچاو زیاد دەكات و مۆدێلی بڕیاری زۆرینە و تاكەحزبی كۆتایی پێدێنێت بەجۆرێك پێكهێنانی حكومەتی خۆجێی لەپارێزگای نەینەوا دەبێت بە تەوافقی بێت.

ئاراس محەمەد ئاغا، سەرۆكی هاوپەیمانی یەكێتیی خەڵكی نەینەوا بە SNNی ڕاگەیاند: لەگەڵ نزیك بوونەوە لە بەڕێوەچوونی پرۆسەی هەڵبژاردنی ئەندامانی ئەنجومەنی پارێزگاكانی عێراق، یەكێتی نشتیمانی كوردستان لە سنوری پارێزگای نەینەوا بەڕێژەیەكی زۆر بەرچاو زیاد دەكات ئەگەر نەبینە لیستی دووەم ئەوا لەڕیزبەندی سێیەم دەبین بۆ بەدەستهێنانی زۆرترین دەنگی دەنگدەرانی نەینەوا.

ئاماژەی بەوەشكرد، ئەوەی ئەم هەڵبژاردنە لە هەڵبژاردنەكانی دیكە جیادەكاتەوە ئەوەیە كە زۆربەی ئەو حزبانەی لە هەڵبژاردنەكانی پێشووتر دەنگی زۆریان بەدەستهێناوە و پۆست و پلەكانی پارێزگاكەیان لەبەرژەوەندی خۆیان قۆرخكردبوو ئەمجارە زۆرینەی دەنگەكانیان لەدەستدەدەن و لەبەرامبەردا یەكێتی دەنگەكانی زیاد دەكاتی و كۆتایی بە قۆرخكاری دێنێت.

سەرۆكی هاوپەیمانی یەكێتیی خەڵكی نەینەوا، ئەوەشی خستەڕوو،پێكهێنانی حكومەتی خۆجیی لەپارێزگای نەینەوا دەبێت بە تەوافقی بێت چونكە مۆدیلی زۆرینە و بڕیاری تاكە حزبی كۆتایی دێت و كورسیەكان كە ژمارەیان 26 كورسییە دەبێت لە نێوان 10 قەوارە و هاوپەیمانی سیاسی دابەشبكرێن، كە یەكێتیی نیشتمانی كوردستان لە پارێزگای نەینەوا بە هاوپەیمانی خەڵكی نەینەوا بە ژمارە 134بەشداری هەڵبژاردنەكەی كردووە و هاوپەیمانێتییەكە 52 كاندیدی هەیە كە كەسانی پسپۆڕ و شارەزان لە بوارە جیاوازەكاندا.