دوای پلەبەرزکردنەوەی ئەفسەرانی پێشمەرگە مامۆستایانیش داوای پلەبەرزکردنەوە دەکەن

یەكێتی مامۆستایانی كوردستان دوای پلەبەزرکردنەوە دەکات و دەڵێت: ماوەی 10 ساڵە مامۆستایان و فەرمانبەران لەچاوەڕوانیدان بۆ دەستپێكردنەوەی پلەبەرزكردنەوەیان بۆیە داواكارین هەنگاو و بڕیاری جددی بنرێت بۆ دەستپێكردنەوەی پلەبەرزكردنەوەی مامۆستایان.

مەكتەبی سكرتاریەتی یەكێتی مامۆستایانی كوردستان لە بەیاننامەیەكدا ئاماژەی بەوەكردووە، وەكو دەزانن مامۆستایان لە بارودۆخێكی سەختدان. جارێكی دیكە جەخت دەكەینەوە لەسەر یاداشتە چوار خاڵییەكەی یەكێتی مامۆستایان، كە بۆ ئەنجوومەنی وەزیران بەرزكراوەتەوە، کە بریتین لە (پێدانی مووچەی مانگانە لەكاتی خۆی، دەستپێكردنەوەی پلەبەرزكردنەوەی مامۆستایان و فەرمانبەران، دامەزراندن یان بە گرێبەستكردنی مامۆستایانی وانەبێژ و هاوتاكردنی مووچەی خانەنشینانی هەرێم وەكو خانەنشینانی عێراق).

مامۆستایان دەشڵێن:” مامۆستایانیش بەهەمان شێوەی برا ئەفسەرو پێشمەرگەكان شایەنی پلەبەرزكردنەوەن. لەكاتێكدا ئەمڕۆ نۆیەمین خشتەی پلەبەرزكردنەوەی ئەفسەرانی هێزی پێشمەرگەی كوردستان دەرچووە، بەڵام هێشتا پلە بەرزكردنەوەی مامۆستایان دەستی پێنەكردووە”.

ئەوە لە کاتێکدایە دوێنێ وەزارەتی پشێمەرگە رایگەیاند، خشتەی پلەبەرزکردنەوەی زیاتر لە چوار هەزاری ئەفسەرانی سەربەوەزارەتەکەی گەراوەتەوە.