وەزیری بەرگری تورکیا گەیشتە بەغدا

SNN

وەزیری بەرگری تورکیا بەسەردانێک گەیشتە بەغدا و لەگەڵ سەرۆک کۆماری عێراق کۆبووەوە و گفتوگۆیان لەبارەی دۆخی ئەمنی ناوچەکە کرد.

یەشار گولەر، وەزیری بەرگریی تورکیا، جەنەڕاڵ مەتین گورەک، فەرماندەی گشتی ئەرکانی سوپای تورکیا بەسەردانێک گەیشتنە بەغدا، لەگەڵ د. لەتیف رەشید سەرۆک کۆماری عێراق، بۆ گفتوگۆکردن لەسەر رەوشی ئەمنی ناوچەکە کۆبوونەوە کۆبوونەوە.

بڕیارە وەزیری بەرگری تورکیا زنجیرەیەک دیدار و کۆبوونەوە لەگەڵ سەرۆک وەزیران و لێپرسراوانی دیکەی عێراق ئەنجام بدات، هاوکات چاوەڕوان دەکرێت سەردانی هەرێمی کوردستانیش بکات.

ماڵپەڕی فەرمی وەزارەتی بەرگری تورکیا لە پۆستێکی تۆڕی کۆمەڵایەتیی ئێکس رایگەیاند، سەردانەکە بە مەبەستی کۆبوونەوە و گفتوگۆکردنە لەبارەی پەیوەندییەکانی هەردوولا و ئەو بابەتانەی کە هەردوولا هەماهەنگییان لەسەر هەیە.

سەردانەکەی گولەر لەکاتێکدایە، رۆژی 23ـی مانگی رابردوو، ئیبراهیم کاڵن، سەرۆکی دەزگای هەواڵگری تورکیا بە سەردانێکی فەرمی گەیشتە بەغدا و لەگەڵ سەرۆک کۆمار و سەرۆکوەزیران و بەرپرسە باڵاکانی عێراق کۆبووبووەوە.